സുല്‍ത്താന്‍ ബത്തേരി: രാഹുല്‍ ഗാന്ധിക്ക് വോട്ട് തേടി വേറിട്ട പ്രചാരണ മാര്‍ഗവുമായി ബത്തേരിയിലെ കോണ്‍ഗ്രസ് നേതാവ് കുന്നത്ത് അഷ്‌റഫും സംഘവും. രാഹുല്‍ ഗാന്ധിയുടെ വോട്ടഭ്യര്‍ഥന വിതരണം ചെയ്യാനാണ് അഷ്‌റഫ് വേറിട്ട രീതി സ്വീകരിച്ചത്.കലാ രൂപങ്ങളായ തെയ്യത്തിന്റെയും ചെണ്ടയുടേയും അകമ്പടിയോടെയായിരുന്നു വോട്ടുപിടുത്തം. ഗാന്ധി തൊപ്പിയണിഞ്ഞ് തോള്‍സഞ്ചിയും കൈപ്പത്തി ചിഹ്നമുള്ള ഷാളുമിട്ടായിരുന്നു അഷ്‌റഫ് നടന്നത്. ബസുകളില്‍ കയറിയിറങ്ങിയും വ്യാപാരികളോടും ഡ്രൈവര്‍മാരോടും തൊഴിലാളികളോടും വോട്ടഭ്യര്‍ഥിച്ചുമാണ് സംഘം നീങ്ങിയത്.രാവിലെ ബസ് സ്റ്റാന്‍ഡില്‍ നിന്നാരംഭിച്ച യാത്രടൗണ്‍ ചുറ്റി കോട്ടക്കുന്ന് യു.ഡി.എഫ് തെരഞ്ഞെടുപ്പ് സമിതി ഓഫിസിനു മുന്നിലാണ് സമാപിച്ചത്. വോട്ടഭ്യര്‍ഥന വീടുകളിലെത്തിക്കുന്ന പതിവ് പ്രചാരണ പരിപാടിയില്‍ നിന്നും മാറി ചിന്തിച്ചത് വോട്ടര്‍മാരുടെ ശ്രദ്ധ പിടിച്ചുപറ്റാനും അത് രാഹുല്‍ ഗാന്ധിക്ക് ചരിത്ര ഭൂരിപക്ഷമായി മാറാനുമാണെന്ന് പരിപാടിയില്‍ പങ്കെടുത്തവര്‍ പറഞ്ഞു. യു.ഡി.എഫ് ഭാരവാഹികളായ കോണിക്കല്‍ ഖാദര്‍, പി.പി അയ്യൂബ്, ബാബു പഴുപ്പത്തൂര്‍, ഷബീര്‍ അഹമ്മദ്, സക്കരിയ മണ്ണില്‍, ടി.ജി ചെറുതോട്ടില്‍, എല്‍ദോസ് പൈനാടത്ത് ഒപ്പമുണ്ടായിരുന്നു.