എടപ്പാള്‍: ഭാരതത്തിന്റെ ഐക്യവും അഖണ്ഡതയും ഉദ്‌ഘോഷിച്ചു കൊണ്ടണ്ട് അധ്യാപക സംഘം പതിമൂന്ന് സംസ്ഥാനങ്ങളില്‍ സന്ദര്‍ശനം നടത്തുന്നു.പൂക്കരത്തറ ദാറുല്‍ ഹിദായ ഓര്‍ഫനേജ് ഹയര്‍ സെക്കന്‍ഡറി സ്‌കൂളിലെ അധ്യാപകരാണ് യാത്ര പുറപ്പെട്ടത്.
 യാത്രയുടെ ഫ്‌ളാഗ് ഓഫ് മലപ്പുറം ജില്ലാ കലക്ടര്‍ അമിത് മീണ ഐ.എ.എസ് നിര്‍വഹിച്ചു. വിദ്യാഭ്യാസത്തെ സാമൂഹ്യപ്രതിബന്ധതയുള്ള പ്രവര്‍ത്തനങ്ങളുമായി ബന്ധിപ്പിക്കാന്‍ ഉദ്യേശിച്ചു കൊണ്ടണ്ട് രൂപം കൊടുത്ത സ്‌കൂള്‍ ഫോര്‍ സോഷ്യല്‍ ഇനിഷ്യേറ്റീവിന്റെ ഭാഗമായാണ് യാത്ര സംഘടിപ്പിച്ചിട്ടുള്ളത്.
എ ജേര്‍ണി ഫോര്‍ വണ്‍നസ് എന്ന പേരില്‍ നടത്തുന്ന യാത്രയില്‍ ഒരോ സംസ്ഥാനങ്ങളിലേയും തിരഞ്ഞെടുത്ത വിദ്യാലയങ്ങളില്‍ ഇന്ത്യന്‍ ദേശീയതയുടെ പ്രാധാന്യത്തേയും ഭാരതത്തിന്റെ അഖണ്ഡതയെയും കുറിച്ച് വിദ്യാര്‍ഥികള്‍ക്ക് അവബോധം സൃഷ്ടിക്കും.
കൂടാതെ വിദ്യാര്‍ഥികളുടെ തള്ളവിരല്‍ കൊണ്ടണ്ട് ദേശീയതയുടെ ക്യാന്‍വാസ് ചിത്രീകരണങ്ങളും നടത്തും. ഈ ചിത്രങ്ങള്‍ പ്രസിഡന്റിന് കൈമാറാനും സംഘം ശ്രമിക്കും. അധ്യാപകരായ എം.വി.അബ്ദുള്‍ ജലീല്‍, വി.അബ്ബാസലി, എസ്.കബീര്‍, വി.മുഹമ്മദ് സാലിം എന്നിവരാണ് സംഘത്തിലുള്ളത്.