മലപ്പുറം: ആവശ്യാനുസരണം ജീവനക്കാരില്ലാത്തത് ജില്ലയിലെ തദ്ദേശ സ്ഥാപനങ്ങളുടെ പ്രവര്‍ത്തനം അവതാളത്തിലാക്കുന്നു. എട്ട് മാസമായി ജില്ലാ പഞ്ചായത്ത് സെക്രട്ടറിയുടെ കസേര ഒഴിഞ്ഞു കിടക്കുകയാണ്.
തദ്ദേശ സ്ഥാപനങ്ങളിലെ എന്‍ജിനീയറിങ് വിഭാഗത്തിലാണ് കാര്യമായ ഒഴിവുകളുള്ളത്. പല പഞ്ചായത്തുകളിലും സെക്രട്ടറിമാരുടെ കസേരകളിലും ആളില്ല.  27 അസിസ്റ്റന്റ് എന്‍ജിനീയര്‍മാരുടെ ഒഴിവാണ് ജില്ലയിലുള്ളത്. അഞ്ച് അസിസ്റ്റന്റ് എക്‌സിക്യൂട്ടിവ് എന്‍ജിനീയര്‍മാരും ജില്ലയില്‍ കുറവാണ്. ഇതിന് പുറമെ ബി.ഡി.ഒമാരില്ലതെ എട്ടു ബ്ലോക്കു പഞ്ചായത്ത് ഓഫിസുകളും പ്രതിസന്ധിയാലാണ്.
ജില്ലയില്‍ ചെലവഴിക്കാതെ കിടക്കുന്ന കോടിക്കണക്കിന് രൂപയുടെ റിവര്‍മാനേജ്‌മെന്റ് ഫണ്ട് ഉപയോഗപ്പെടുത്തി ജലക്ഷാമം പരിഹരിക്കുന്നതിനാവശ്യമായ നടപടി സ്വീകരിക്കണമെന്ന് ജില്ലാ പഞ്ചായത്ത് അംഗം ഹനീഫ പുതുപറമ്പ് പ്രമേയത്തില്‍ ആവശ്യപ്പെട്ടു. അതിരൂക്ഷമായ വരള്‍ച്ചായണ് ജില്ലയില്‍ അനുഭവപ്പെടുന്നത്. കുളം നവീകരിക്കുന്നത് വരും തലമുറക്ക് പ്രയോജനം ചെയ്യും. ഈ സഹചര്യത്തില്‍ ഫണ്ട് ലഭ്യമാക്കുന്നതിനാവശ്യായ നടപടി കൈക്കൊള്ളണമെന്നും പ്രമേയം ആവശ്യപ്പെട്ടു. ബക്കര്‍ ചെര്‍ണൂര്‍ പ്രമേയത്തെ പിന്താങ്ങി.