കാസര്‍കോട്: ശുചിത്വത്തെക്കുറിച്ചും മാലിന്യ സംസ്‌കരണത്തെക്കുറിച്ചും 'എന്റെ മാലിന്യം എന്റെ ഉത്തരവാദിത്വം' എന്ന ശുചിത്വ മിഷന്റെ നയത്തെക്കുറിച്ചും വിദ്യാര്‍ഥികളില്‍ അവബോധം സൃഷ്ടിക്കുന്നതിനു തദ്ദേശസ്വയം ഭരണം, വിദ്യാഭ്യാസം, ആരോഗ്യം, ആഭ്യന്തരം എന്നീ വകുപ്പുകളുടെ സഹകരണത്തോടെ ജില്ലാ ശുചിത്വ മിഷന്‍ ത്രിദിന ചക്ക, മാങ്ങ, തേങ്ങ ക്യാംപ് സംഘടിപ്പിക്കും. എല്ലാ ഗ്രാമ പഞ്ചായത്തുകളിലും രണ്ടില്‍ കുറയാത്തത്, നഗരപ്രദേശങ്ങളില്‍ 10 ഡിവിഷനുകള്‍ക്ക് ഒന്നില്‍ കുറയാത്തത് എന്ന രീതിയില്‍ ഗ്രാമ പഞ്ചായത്തുകള്‍, നഗരസഭകള്‍ എന്നിവ കേന്ദ്രീകരിച്ചാണ് ക്യാംപ്. 50 കുട്ടികള്‍ക്ക് ക്യാംപില്‍ പങ്കെടുക്കാം.
ശുചിത്വം, മാലിന്യസംസ്‌കരണം, ആരോഗ്യം എന്നിവയുമായി ബന്ധപ്പെട്ട വീഡിയോ പ്രദര്‍ശനങ്ങളും ക്യാംപില്‍ ഉണ്ടാകും. ക്യാംപ് ദിവസങ്ങളിലെ ഭക്ഷണാവശിഷ്ടങ്ങള്‍ ഏതെങ്കിലുമൊരു കമ്പോസ്റ്റ് യൂനിറ്റില്‍ നിക്ഷേപിക്കും.
ബഹുജന പങ്കാളിത്തവും ശബ്ദവും വര്‍ണവും ശുചിത്വ സന്ദേശങ്ങളും ഉള്‍പ്പെടുത്തിക്കൊണ്ട് റാലിയും സംഘടിപ്പിക്കും. ഒന്നാം ദിവസം ചക്ക, രണ്ടാം ദിവസം മാങ്ങ, മൂന്നാം ദിവസം തേങ്ങ എന്നിവ കൊണ്ടുണ്ടാക്കുന്ന വിഭവങ്ങളും കുട്ടികള്‍ക്കു ഭക്ഷണത്തിന്റെ കൂടെ നല്‍കും.