കല്‍പ്പറ്റ: വാഗ്ദാനങ്ങളുടെ പെരുമഴ നല്‍കി ഒന്നു പോലും പൂര്‍ത്തിയാക്കാനാകാത്ത മോദി 'ബ്ലഫ്മാസ്റ്റര്‍' മാത്രമാണെന്ന് തെളിയിച്ചിരിക്കുകയാണെന്ന് എ.ഐ.സി.സി ജനറല്‍ സെക്രട്ടറി മുകുള്‍ വാസ്‌നിക് പറഞ്ഞു. കല്‍പ്പറ്റയില്‍ മാധ്യമങ്ങളോട് സംസാരിക്കവേയാണ് വെറും വീമ്പിളക്കുന്ന ആളെന്ന അര്‍ഥം വരുന്ന ബ്ലഫ്മാസ്റ്റര്‍ മാത്രമാണ് മോദിയെന്ന് മുകുള്‍ വാസ്‌നിക് പറഞ്ഞത്. രാജ്യത്തിന്റെ സാമ്പത്തിക മേഖലയിലായാലും, ജി.എസ്.ടി, തൊഴിലവസരങ്ങള്‍, കാര്‍ഷികമേഖല, പിന്നാക്ക വിഭാഗങ്ങളുടെ വികസനം എന്നിങ്ങനെ ഏത് കാര്യത്തിലായാലും മോദിക്ക് പറഞ്ഞ വാക്ക് പാലിക്കാനായില്ലെന്നും അദ്ദേഹം കൂട്ടിച്ചേര്‍ത്തു. കല്‍പ്പറ്റയില്‍ ആരംഭിച്ച യു.ഡി.എഫ് മീഡിയ സെന്റര്‍ ഉദ്ഘാടനം ചെയ്ത ശേഷമാണ് എ.ഐ.സി.സി ജനറല്‍ സെക്രട്ടറിമാരായ മുകുള്‍ വാസ്‌നികും കെ.സി വേണുഗോപാലും മാധ്യമങ്ങളെ കണ്ടത്.