കോഴിക്കോട്: ഒരു പ്രകോപനവുമില്ലാതെ വേളം പുത്തലത്ത് മുസ്‌ലിം യൂത്ത്‌ലീഗ് പ്രവര്‍ത്തകന്‍ നസീറുദ്ദീനെ കുത്തിക്കൊലപ്പെടുത്തിയവരെ നിയമത്തിനു മുന്നില്‍ കൊണ്ടുവരണമെന്ന് മുസ്‌ലിം ലീഗ് സംസ്ഥാന ജനറല്‍ സെക്രട്ടറി കെ.പി.എ.മജീദ് ആവശ്യപ്പെട്ടു. ഏകപക്ഷീയ ആക്രമണത്തിലൂടെ തങ്ങളുടെ തനിരൂപം പ്രകടിപ്പിക്കുകയായിരുന്നു എന്‍.ഡി.എഫും എസ്.ഡി.പി.ഐയും. ആക്രമണത്തെ ആക്രമണം കൊണ്ടു നേരിടുന്നതു മുസ്‌ലിംലീഗ് നയമല്ല.

ഇടതുപക്ഷത്തിന്റെ കോട്ടയായി ഗണിച്ചിരുന്ന കുറ്റ്യാടി യു.ഡി.എഫ് മുസ്‌ലിംലീഗിലൂടെ പിടിച്ചെടുത്തതോടെ സി.പി.എമ്മിന്റെ കൂലിത്തല്ലുകാരായി മേഖലയില്‍ എന്‍.ഡി.എഫുകാര്‍ മാറിയിരിക്കുകയാണ്. ഭൂരിപക്ഷ-ന്യൂനപക്ഷ വര്‍ഗീയതകള്‍ക്കെതിരേ മുസ്‌ലിംലീഗ് ശക്തമായി നിലയുറപ്പിക്കും. കുറ്റക്കാര്‍ക്കെതിരേ പൊലിസ് ശക്തമായ നടപടിക്കു തയാറാകണം. മേഖലയില്‍ സമാധാനം ഉറപ്പാക്കാനും അക്രമികളെ ഒറ്റപ്പെടുത്താനും എല്ലാവരും മുന്നോട്ടുവരണം.

നസീറുദ്ദീന്റെ വിയോഗം ഉണ്ടാക്കിയ മുറിവ് സംഘര്‍ഷമാവാതെ കാത്തുസൂക്ഷിക്കാന്‍ പ്രവര്‍ത്തകര്‍ ജാഗ്രത പാലിക്കണമെന്നും കെ.പി.എ മജീദ് ആവശ്യപ്പെട്ടു.

ശക്തമായ നടപടി വേണം: യൂത്ത് ലീഗ്

കോഴിക്കോട്: വേളത്തു മുസ്‌ലിം യൂത്ത്‌ലീഗ് പ്രവര്‍ത്തകന്‍ നസീറുദ്ദീനെ കൊലപ്പെടുത്തിയ എന്‍.ഡി.എഫുകാരെ നിയമത്തിനു മുന്നില്‍ കൊണ്ടുവരണമെന്നും എന്‍.ഡി.എഫിനെതിരേ ശക്തമായ നടപടികളെടുക്കണമെന്നും മുസ്‌ലിം യൂത്ത്‌ലീഗ് സംസ്ഥാന പ്രസിഡന്റ് പി.എം സാദിഖലിയും ജനറല്‍ സെക്രട്ടറി സി.കെ.സുബൈറും ആവശ്യപ്പെട്ടു. യാതൊരു പ്രകോപനവും ഇല്ലാതെയാണ് നസീറുദ്ദീനെ കൊലപ്പെടുത്തിയത്. കൊലപാതകത്തിനു പിന്നിലെ ഗൂഢാലോചന അന്വേഷിച്ചു പുറത്തുകൊണ്ടുവരണം. മനപൂര്‍വമായ നരഹത്യയിലെ ഒരു കുറ്റവാളിയും രക്ഷപ്പെടാന്‍ പാടില്ല.

തീവ്രവാദ സംഘടനകളോട് യൂത്ത് ലീഗ് പുലര്‍ത്തുന്ന കര്‍ക്കശ നിലപാടിനോടുള്ള പ്രതികാരമായിട്ടു കൂടി വേണം ഇതിനെ കാണേണ്ടത്. എന്‍.ഡി.എഫില്‍ ചേരുന്നതിനു വൈമനസ്യം പ്രകടിപ്പിച്ചതിലുള്ള വിരോധമാണ് നസീറുദ്ദീന്റെ കൊലയ്ക്കു പിന്നില്‍.

സംഭവത്തില്‍ സര്‍ക്കാര്‍ എന്തു നിലപാടാണു സ്വീകരിക്കുകയെന്നു വ്യക്തമാക്കണം. വോട്ടിനുവേണ്ടി ഒളിഞ്ഞും തെളിഞ്ഞും ഇത്തരം തീവ്രവാദ ശക്തികളെ ഒപ്പംകൂട്ടുന്നവര്‍ ഇതിനു മറുപടി പറയണം.

നസീറുദ്ദീന്റെ കൊലയാളികള്‍ പിടിക്കപ്പെട്ടേക്കാം. എന്നാല്‍ തീവ്രവാദ പ്രവര്‍ത്തനവും അക്രമണങ്ങളും തുടരുകയാണ്. ഇതിനെ എന്നേക്കുമായി അവസാനിപ്പിക്കാനുള്ള നടപടികളും നിലപാടുകളുമാണ് ഉണ്ടാകേണ്ടതെന്നും അദ്ദേഹം പറഞ്ഞു. നസീറുദ്ദീന്റെ കൊലപാതകത്തില്‍ പ്രതിഷേധിച്ച് ഇന്നു പ്രകടനം നടത്താനും നേതാക്കള്‍ ആഹ്വാനം ചെയ്തു.