ന്യൂയോര്‍ക്ക്:പ്രമുഖ രാഷ്ട്രങ്ങള്‍ കൊവിഡ് വാക്‌സിന്‍ വികസിപ്പിക്കുന്നത് അവസാന ഘട്ടത്തിലെത്തിയെന്ന് വെളിപ്പെടുത്തിയതിനു പിന്നാലെ വാക്‌സിന്‍ മോഷണ ആരോപണങ്ങളും വര്‍ധിച്ചു. വാക്‌സിന്‍ പരീക്ഷണം റഷ്യ ഹാക്ക് ചെയ്‌തെന്ന് യു.എസ്, ബ്രിട്ടന്‍, കാനഡ എന്നീ രാജ്യങ്ങള്‍ ആരോപിച്ചിരുന്നു. ഇപ്പോഴിതാ ചൈനയും ആരോപണത്തിനിരയായിരിക്കുന്നു.
യു.എസ് അറ്റോര്‍ണി ജനറല്‍ വില്യം ബാറാണ് ചൈനക്കെതിരേ ആരോപണം ഉന്നയിച്ചിരിക്കുന്നത്. കൊവിഡ് പടര്‍ന്നുപിടിക്കുന്ന സാഹചര്യത്തില്‍ വാക്‌സിന്‍ വികസിപ്പിക്കുന്നത് സംബന്ധിച്ച വിവരങ്ങള്‍ മോഷ്ടിക്കാന്‍ ചൈന അമേരിക്കന്‍ യൂണിവേഴ്‌സിറ്റികളേയും ബിസിനസിനേയും ഹാക്ക് ചെയ്യാന്‍ ശ്രമിച്ചെന്നാണ് ബാര്‍ പറഞ്ഞത്.
എന്നാല്‍ ബാറിന്റെ ആരോപണത്തെ അസംബന്ധം എന്നാണ് ചൈനീസ് വിദേശകാര്യ മന്ത്രാലയ വക്താവ് ഹുവ ചുനിങ് വിശേഷിപ്പിച്ചത്. പുതിയ കൊറോണ വൈറസ് വാക്‌സിനുകളുടെ ഗവേഷണത്തിലും വികസനത്തിലും ചൈന മുന്നിലാണെന്ന് എല്ലാവര്‍ക്കും അറിയാമെന്നു പറഞ്ഞ അവര്‍ ലോകത്തെ ഏറ്റവും മികച്ച സാങ്കേതിക ശക്തിയായ അമേരിക്കയെ നേരിടാനോ ബദലായി നില്‍ക്കാനോ ചൈന ശ്രമിക്കുന്നില്ലെന്നു വ്യക്തമാക്കി. എന്നാല്‍ വിദ്വേഷമുളവാക്കുന്ന അപവാദങ്ങള്‍ പ്രചരിപ്പിക്കുകയോ വാഷിങ്ടണിന്റെ ഭാഗത്തുനിന്ന് ആക്രമണമുണ്ടാവുകയോ ചെയ്താല്‍ തീര്‍ച്ചയായും തിരിച്ചടിക്കുമെന്നും ചൈനീസ് വക്താവ് മുന്നറിയിപ്പു നല്‍കി.