തിരുവനന്തപുരം: സര്‍ക്കാരിന്റെ മേല്‍ പാര്‍ട്ടിക്ക് നിയന്ത്രണമുണ്ടെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍. നയപരമായ തീരുമാനങ്ങള്‍ പാര്‍ട്ടി തന്നെയാണ് എടുക്കുന്നത്. സ്വര്‍ണക്കടത്ത് കേസില്‍ സര്‍ക്കാരിനും സി.പി.എമ്മിനും ഒന്നും ഒളിക്കാനില്ലെന്നും മുഖ്യമന്ത്രിക്കും സര്‍ക്കാരിനും പാര്‍ട്ടിയുടെ പൂര്‍ണ പിന്തുണ ഉണ്ടെന്നും കോടിയേരി സി.പി.എം സംസ്ഥാന സെക്രട്ടേറിയറ്റ് യോഗത്തിനു ശേഷമുള്ള വാര്‍ത്താസമ്മേളനത്തില്‍ പറഞ്ഞു.
ശിവശങ്കറിനെ ആരോപണം ഉയര്‍ന്നപ്പോള്‍ തന്നെ മുഖ്യമന്ത്രിയുടെ ഓഫിസില്‍ നിന്ന് മാറ്റി. ശിവശങ്കറിന് എതിരേ കസ്റ്റംസോ എന്‍.ഐ.എയോ റിപ്പോര്‍ട്ട് നല്‍കിയിട്ടില്ല. സ്വപ്നയ്ക്ക് വഴിവിട്ട രീതിയില്‍ നിയമനം നല്‍കിയെന്ന ആരോപണം അന്വേഷിക്കാന്‍ ചീഫ് സെക്രട്ടറിയുടെ നേതൃത്വത്തില്‍ അന്വേഷണം നടത്തി. റിപ്പോര്‍ട്ട് കിട്ടിയ ഉടന്‍ തന്നെ സസ്‌പെന്റ് ചെയ്തു. പ്രതിപക്ഷം സമരം തുടരുന്നതിനു പിന്നില്‍ രാഷ്ട്രീയലക്ഷ്യം മാത്രമാണ്.
സ്വര്‍ണക്കടത്തു കേസിന് സോളര്‍ കേസുമായി താരതമ്യമില്ലെന്നും കോടിയേരി പറഞ്ഞു. സ്വര്‍ണക്കടത്ത് കേസില്‍ മുഖ്യമന്ത്രിയുടെ കൈയും മുഖ്യമന്ത്രിയുടെ ഓഫിസും ശുദ്ധമാണെന്നും കോടിയേരി പറഞ്ഞു.