ശ്രീനഗര്‍: ജമ്മു കശ്മിരില്‍ ഇന്നലെയുണ്ടായ ഏറ്റുമുട്ടലില്‍ മൂന്നു തീവ്രവാദികളെക്കൂടി വധിച്ചതായി സൈന്യം. 

ജയ്‌ഷെ മുഹമ്മദ് സംഘടനയുടെ കമാന്‍ഡറടക്കം മൂന്നുപേര്‍ ഇന്നലെ പുലര്‍ച്ചെ കുല്‍ഗാം ജില്ലയില്‍ നടന്ന ഏറ്റുമുട്ടലില്‍ കൊല്ലപ്പെട്ടെന്നാണ് സൈന്യം വ്യക്തമാക്കുന്നത്. സംഭവത്തില്‍ മൂന്നു സൈനികര്‍ക്കു പരുക്കേറ്റിട്ടുമുണ്ട്.

സി.ആര്‍.പി.എഫും കുല്‍ഗാം പൊലിസും സൈന്യവും നടത്തിയ സംയുക്ത നീക്കത്തിലാണ് തീനവ്രവാദികള്‍ കൊല്ലപ്പെട്ടത്. 

ചിമ്മെര്‍ ഗ്രാമത്തില്‍ തീവ്രവാദ സാന്നിധ്യമുണ്ടെന്നു വ്യക്തമായതോടെ സൈന്യം തിരിച്ചിലിനെത്തുകയായിരുന്നു. 

തുടര്‍ന്നു വെടിവയ്പ് നടന്നു. മൂന്നിലേറെ ഏറ്റുമുട്ടലുകളില്‍ സൈന്യത്തില്‍നിന്നു രക്ഷപ്പെട്ട ജയ്‌ഷെ മുഹമ്മദ് കമാന്‍ഡറാണ് ഇന്നലെ കൊല്ലപ്പെട്ടതെന്നാണ് സൈന്യം വ്യക്തമാക്കുന്നത്. ഈ സംഘത്തില്‍നിന്ന് ആയുധങ്ങള്‍ പിടിച്ചെടുത്തിട്ടുമുണ്ട്.