മാഡ്രിഡ്: ലാലിഗ കീരിടത്തില്‍ റയല്‍ മാഡ്രിഡിന്റെ മുത്തം. കഴിഞ്ഞ ദിവസം വിയ്യാറയലിനെ 2-1ന് പരാജയപ്പെടുത്തിയാണ് റയല്‍ മാഡ്രിഡ് 34ാം തവണയും കിരീടം സ്വന്തമാക്കിയത്. മറ്റൊരു മത്സരത്തില്‍ ബാഴ്‌സലോണ ഒസാസുനയോട് പരാജയപ്പെടുകയും ചെയ്തതാണ് റയലിനെ കിരീട ധാരണത്തിലേക്ക് നയിച്ചത്. മത്സരത്തില്‍ റയല്‍ മാഡ്രിഡിന്റെ രണ്ട് ഗോളുകളും നേടിയത് ബെന്‍സേമയായിരുന്നു. 29, 77 മിനുട്ടുകളിലായിരുന്നു ബെന്‍സേമയുടെ ഗോളുകള്‍. 83ാം മിനുട്ടില്‍ വിസന്റെ ഇബോറയായിരുന്നു വിയ്യാറയലിന്റെ ആശ്വാസ ഗോള്‍ നേടിയത്. ലീഗില്‍ റയല്‍ മാഡ്രിഡിന് ഒരു മത്സരം കൂടി ബാക്കി നില്‍ക്കെയായിരുന്നു കിരീട നേട്ടം. കിരീട പോരാട്ടത്തില്‍ റയലിനൊപ്പമുണ്ടായിരുന്ന ബാഴ്‌സലോണ 2-1 എന്ന സ്‌കോറിനായിരുന്നു ഒസാസുനയോട് പരാജയപ്പെട്ടത്. 62ാം മിനുട്ടില്‍ ലയണല്‍ മെസ്സിയായിരുന്നു ബാഴ്‌സയുടെ ആശ്വാസ ഗോള്‍ നേടിയത്.