കൊട്ടാരക്കര: കൊട്ടാരക്കര കേന്ദ്രീകരിച്ച് ആര്‍.എസ്.എസും എസ്.ഡി.പി.ഐയും നടത്തിക്കൊണ്ടിരിക്കുന്ന അക്രമപ്രവര്‍ത്തനങ്ങള്‍ അവസാനിപ്പിച്ച് സമാധാന ജീവിതം ഉറപ്പുവരുത്താന്‍ ജില്ലാ ഭരണകൂടം നടപടിയെടുക്കണമെന്നു കൊടിക്കുന്നില്‍ സുരേഷ് എം.പി ആവശ്യപ്പെട്ടു. 

കൊട്ടാരക്കര മുസ്‌ലിം സ്ട്രീറ്റിലെ ഇറച്ചിവ്യാപാരം നടത്തുന്ന ആളുകളെ അക്രമിച്ചു പരുക്കേല്‍പ്പിച്ചതിനെ തുടര്‍ന്ന് എസ്.ഡി.പി.ഐ പ്രവര്‍ത്തകര്‍ ആര്‍.എസ്.എസുകാരനായ ജവാന്റെ വീടിനു നേരെ അക്രമണം നടത്തുകയായിരുന്നു. ഇതിനെ തുടര്‍ന്ന് ഒരാഴ്ച കൊട്ടാരക്കര മേഖലയില്‍ നിരോധനാജ്ഞ പ്രഖ്യാപിച്ചിരുന്നു. നിരോധനാജ്ഞ പിന്‍വലിച്ചപ്പോള്‍ കഴിഞ്ഞദിവസം ബി.ജെ.പി, ആര്‍.എസ്.എസ് പ്രവര്‍ത്തകാര്‍ കൊട്ടാരക്കരയില്‍ പ്രകടനം നടത്തുകയുണ്ടായി.
വര്‍ഗീയ പ്രവര്‍ത്തനങ്ങള്‍ നടത്തുന്ന സംഘടനകളെ നീയന്ത്രിക്കാന്‍ പൊലിസിനു കഴിയുന്നില്ല. ജില്ലയിലെ പൊലിസ് സംവിധാനം പൂര്‍ണമായും പരാജയപ്പെട്ടിരിക്കുകയാണ്. വര്‍ഗീയതയുടെ പേരില്‍ അക്രമികള്‍ അഴിഞ്ഞാട്ടം നടത്തി ജനജീവിതം ദുസ്സഹമാക്കിക്കൊണ്ടിരിക്കുന്ന സാഹചര്യമാണു കൊട്ടാരക്കരയടക്കം ജില്ലയുടെ പലഭാഗത്തും നടക്കുന്നത്.
സമാധാന ജീവിതം ഉറപ്പുവരുത്താനും അക്രമികളെ കര്‍ശനമായി നേരിടാനുമുള്ള സംവിധാനം ജില്ലയില്‍ ഇല്ലാതെ വന്നിരിക്കുകയാണ്. വര്‍ഗീയ സംഘട്ടനങ്ങള്‍ മനഃപൂര്‍വം സൃഷ്ടിച്ച് മുതലെടുപ്പ് നടത്താന്‍ ഇരുവിഭാഗങ്ങളും ശ്രമിക്കുകയാണ്. ഇതിനു തടയിടണം.
എസ്.ഡി.പി.ഐയും ആര്‍.എസ്.എസും ആയുധങ്ങളെടുത്ത് അക്രമങ്ങള്‍ക്കു നേതൃത്വം നല്‍കുന്നത് ജില്ലയില്‍ ആവര്‍ത്തിക്കാന്‍ പാടില്ല. ജില്ലയില്‍ ക്രമസമാധാനം തകര്‍ന്നതിന്റെ സൂചനകളാണ് കൊട്ടാരക്കരയിലെ അടുത്ത കാലത്ത് നടന്ന ഏറ്റുമുട്ടലുകളെന്നും കൊടിക്കുന്നില്‍ സുരേഷ് എം.പി പറഞ്ഞു.
ഇപ്പോള്‍ ഉണ്ടായതിനേക്കാള്‍ കൂടുതല്‍ ഏറ്റുമുട്ടലുകള്‍ ഇരുഭാഗത്തു നിന്നും വീണ്ടും ഉണ്ടാകാന്‍ സാധ്യതയുണ്ട്. അനിഷ്ട സംഭവങ്ങള്‍ ആവര്‍ത്തിക്കാതിരിക്കാന്‍ ജില്ലാ കലക്ടര്‍ മുന്‍കൈയെടുത്ത് സമാധാന യോഗം വിളിക്കണമെന്നും എം.പി ആവശ്യപ്പെട്ടു. അക്രമങ്ങള്‍ക്കു നേതൃത്വം നല്‍കുന്നവര്‍ക്കെതിരേ മുഖം നോക്കാതെ നടപടിയെടുക്കണമെന്നും കൊടിക്കുന്നില്‍ സുരേഷ് എം.പി ആവശ്യപ്പെട്ടു.