ടോക്കിയോ: കഴിഞ്ഞ ദിവസം കാണാതായ ജപ്പാന്‍ വിമാനത്തിന്റെ അവശിഷ്ടങ്ങള്‍ കണ്ടെത്തി. ജപ്പാന്റെ എഫ് -35 യുദ്ധ വിമാനമാണ് പസഫിക് സമുദ്രത്തില്‍ നിന്ന് അപ്രത്യക്ഷമായത്.

വിമാനത്തിലുണ്ടായിരുന്ന പൈലറ്റിനെ ഇതുവരെ കണ്ടെത്താനായില്ലെന്ന് ജപ്പാന്‍ സൈന്യം അറിയിച്ചു. വിമാനത്തിന്റെ അവശിഷ്ടങ്ങള്‍ പസഫിക് സമുദ്രത്തിലാണ് കണ്ടെത്തിയത്. ഒരു വര്‍ഷത്തെ പഴക്കം മാത്രമുള്ള വിമാനം എന്തുകൊണ്ടാണ് റഡാറില്‍ നിന്ന് അപ്രത്യക്ഷമായി തകര്‍ന്നതെന്ന് കാര്യം വ്യക്തമല്ല. വിമാനത്തിന്റെ അവശിഷ്ടങ്ങള്‍ കണ്ടെത്തിയെന്നും തകര്‍ന്നതാണെന്നാണ് കരുതുന്നതെന്നും ജപ്പാന്‍ പ്രതിരോധ മന്ത്രി തകഷി ഇവായ പറഞ്ഞു. ചൊവ്വാഴ്ച പ്രദേശിക സമയം വൈകിട്ട് 5.27ന് ആണ് ജപ്പാന്റെ വടക്ക് കിഴക്കന്‍ ഭാഗത്ത് നിന്ന് വിമാനം അപ്രത്യക്ഷമായത്.
മിസവ വ്യോമ താവളത്തില്‍ നിന്ന് പുറപ്പെട്ട് 30 മിനിറ്റിനുള്ളിലാണ് വിമാനം അപ്രത്യക്ഷമായത്. പൈലറ്റിനെ കണ്ടെത്താനുള്ള രക്ഷാപ്രവര്‍ത്തനം തുടരുകയാണെന്നും അധികൃതര്‍ അറിയിച്ചു.