അമ്പലപ്പുഴ: അമ്പലപ്പുഴ ശ്രീകൃഷ്ണ ക്ഷേത്രത്തിലെ പതക്കം നഷ്ടപ്പെട്ട സംഭവത്തില്‍ യഥാര്‍ഥ പ്രതിയെ കണ്ടെത്തണമെന്നാവശ്യപ്പെട്ട് വീണ്ടും ഹൈക്കോടതിയെ സമീപിക്കാന്‍ കര്‍മ്മസമിതി അടിയന്തിര യോഗം തീരുമാനിച്ചു.
തിരുവാഭരണ മോഷണവുമായി ബന്ധപ്പെട്ട് കഴിഞ്ഞ ദിവസം പൊലിസ് അറസ്റ്റ് ചെയ്ത പ്രതി വിശ്വനാഥന്‍ യഥാര്‍ഥ കുറ്റവാളിയാണെയെന്ന് സംശയമുണ്ടെന്ന് ഭക്തജനക്കൂട്ടായ്മയായ കര്‍മ്മസമിതി ഭാരവാഹികള്‍ പറഞ്ഞു.
നഷ്ടപ്പെട്ട പതക്കം പ്രതിയെന്ന് പറയപ്പെടുന്നയാള്‍ക്ക് ലഭിച്ചുവെന്നും അത് നടപ്പന്തലില്‍ കട നടത്തുന്ന സ്വര്‍ണ്ണപ്പണിക്കാരന് നല്‍കിയെന്നും പറയുന്നു. എന്നാല്‍ ടെമ്പിള്‍ സ്‌ക്വാഡ് ഇയാളില്‍ നിന്നും 4ഗ്രാം സ്വര്‍ണ്ണം വാങ്ങിവെച്ച് കേസില്‍ നിന്നും ഒഴിവാക്കിയതില്‍ കര്‍മ്മസമിതിയ്ക്ക് സംശയമുണ്ട്.
പ്രതിയെന്ന് പറയുന്ന വിശ്വനാഥനെ നുണപരിശോധനയ്ക്ക് വിധേയമാക്കുക, ക്ഷേത്രത്തിലെ ഏതാനും ജീവനക്കാര്‍ മാത്രം കൈകാര്യം ചെയ്യുന്ന തിരുവാഭരണം എങ്ങനെ കുപ്പത്തൊട്ടിയില്‍ വന്നു എന്നതിനെക്കുറിച്ച് വിശദമായ അന്വേഷണം നടത്തുക എന്നീ ആവശ്യങ്ങള്‍ ഉന്നയിച്ച് ഹൈക്കോടതിയെ സമീപിക്കും. യോഗത്തില്‍ കര്‍മ്മ സമിതി ചെയര്‍മാന്‍ ശങ്കരന്‍നായര്‍ അധ്യക്ഷത വഹിച്ചു.
അനില്‍ പഞ്ചജന്യം, എം സോമന്‍പിള്ള, വി ദില്‍ജിത്ത്, കരുമാടി സുരേന്ദ്രന്‍, എസ് കെ മൂര്‍ത്തി, ഡി സുഭാഷ്, മനോജ് എന്നിവര്‍ പ്രസംഗിച്ചു.