കഴക്കൂട്ടം: തിരുവനന്തപുരം പാര്‍ലമെന്റ് മണ്ഡലം എല്‍.ഡി.എഫ് സ്ഥാനാര്‍ഥി സി. ദിവാകരന് കഴക്കൂട്ടം മണ്ഡലത്തില്‍ സ്‌നേഹോഷ്മളമായ സ്വീകരണം. ജില്ലയിലെ തൊഴിലാളിവര്‍ഗ പോരാട്ടങ്ങളുടെ നേതൃനിരയിലെ ഉജ്ജ്വല സാന്നിധ്യമായ പ്രിയ സഖാവിനെ വരവേല്‍ക്കാന്‍ വിവിധ വിഭാഗം തൊഴിലാളി പ്രവര്‍ത്തകര്‍ ഉള്‍പ്പെടെ നൂറുകണക്കിനാളുകള്‍ ഓരോ സ്വീകരണ കേന്ദ്രത്തിലും അണിനിരന്നു.
രാവിലെ 8ന് അരുവിക്കരക്കോണത്ത് ജനതാദള്‍ എസ് ദേശീയ ജന.റല്‍ സെക്രട്ടറി ഡോ. എ. നീലലോഹിതദാസ് നാടാര്‍ പര്യടന പരിപാടി ഉദ്ഘാടനം ചെയ്തു. ഉദ്ഘാടന കേന്ദ്രത്തില്‍ സ്ത്രീകളും കുട്ടികളും ഉള്‍പ്പെടെ വന്‍ ജനാവലി സ്ഥാനാര്‍ഥിയെ സ്വീകരിക്കാനായി എത്തിയിരുന്നു. ഞാണ്ടൂര്‍ക്കോണം, പൗഡിക്കോണം, ഗാന്ധിപുരം, കേരളാധിത്യപുരം, മണ്ണന്തല, ചെഞ്ചേരി ലക്ഷംവീട്, വാണന്‍വിള, പാറോട്ടുകോണം തുടങ്ങിയ പ്രദേശങ്ങളില്‍ പര്യടനം നടത്തി ഉച്ചവിശ്രമകേന്ദ്രമായ ഇടവക്കോട് എത്തിച്ചേര്‍ന്നു. വൈകിട്ട് 3ന് കട്ടേലയില്‍ നിന്നും ആരംഭിച്ച പര്യടനം അലത്തറ, ശാസ്താംകോണം, ചെറുവക്കല്‍, ചാമവിള, കല്ലമ്പള്ളി, വല്ലുണ്ണി, പോങ്ങുംമൂട്, കൊച്ചുള്ളൂര്‍, പ്രശാന്ത് നഗര്‍, പുലയനാര്‍കോട്ട, ഉള്ളൂര്‍, പഴയറോഡ്, പൂന്തി, ചെന്നിലോട് കോളനി, കുടവൂര്‍, അരശുംമൂട്, വെണ്‍പാലവട്ടം, ഒരുവാതില്‍ക്കോട്ട, ചാരുംമൂട് തുടങ്ങി നിരവധി കേന്ദ്രങ്ങളില്‍ പര്യടനം നടത്തി രാത്രി വൈകി ജവഹര്‍ കോളനിയില്‍ സമാപിച്ചു. എല്‍.ഡി.എഫ് നേതാക്കളായ വി.പി ഉണ്ണികൃഷ്ണന്‍, വി എസ് പത്മകുമാര്‍, പി കെ രാജു, മനോജ് ബി ഇടമന, ചന്തവിള മധു, ആറ്റിപ്ര സദാനന്ദന്‍, മേടയില്‍ വിക്രമന്‍ തുടങ്ങിയവര്‍ സ്ഥാനാര്‍ഥിക്കൊപ്പമുണ്ടായിരുന്നു. വിവിധ സ്വീകരണ കേന്ദ്രങ്ങളില്‍ ജെ അരുണ്‍ബാബു, പാളയം സതീഷ്, ആര്‍ എസ് രാഹുല്‍രാജ്, അഡ്വ. ദിലീപ് ഖാന്‍ സംസാരിച്ചു.