മുക്കം: വിഭാഗീയത രൂക്ഷമായ വ്യാപാരി വ്യവസായി ഏകോപന സമിതി മുക്കം യൂനിറ്റ് പിളര്‍ന്നു.
കഴിഞ്ഞ ദിവസം നടന്ന തെരഞ്ഞെടുപ്പില്‍ കെ. സി നൗഷാദ് ഉജ്വല വിജയം നേടിയതോടെയാണ് സംഘടനയില്‍ പൂര്‍ണമായും അവഗണിക്കപ്പെടുകയും ഒറ്റപ്പെടുകയും ചെയ്ത അബ്ദുല്‍ മജീദ് വിഭാഗം സംഘടന വിടാന്‍ തീരുമാനിച്ചത്. വ്യാപാരി വ്യവസായി ഏകോപന സമിതിയുടെ വിമത ഗ്രൂപ്പായ ഹസ്സന്‍ കോയ വിഭാഗവുമായി അബ്ദുല്‍ മജീദ് വിഭാഗം ചര്‍ച്ച നടത്തിയതായാണ് വിവരം.
കഴിഞ്ഞ ദിവസം നടന്ന യൂനിറ്റ് തെരഞ്ഞെടുപ്പില്‍ കെ.സി നൗഷാദ് പക്ഷവും അബ്ദുല്‍ മജീദ് പക്ഷവും ചേരി തിരിഞ്ഞ് വാക്കേറ്റമുണ്ടാവുകയും അടിപിടിയുടെ വക്കോളമെത്തുകയും ചെയ്തിരുന്നു. 208 വോട്ടിന്റെ ദയനീയ പരാജയവും ഏറ്റുവാങ്ങിയതോടെയാണ് പി.പി അബ്ദുല്‍ മജീദ് സംഘടന വിടാന്‍ തീരുമാനിച്ചത്.
സംസ്ഥാന ജില്ലാ നേതൃത്വത്തിന്റെ പക്ഷപാതപരമായ നടപടിയും സംഘടന വിടാന്‍ കാരണമായതായി അബ്ദുല്‍ മജീദ് അനുഭാവികളായ വ്യാപാരികള്‍ വ്യക്തമാക്കി