ചെന്നൈ: പ്രീമിയര്‍ ഫുട്‌സാലില്‍ ഇന്നലെ നടന്ന ആദ്യ മത്സരത്തില്‍ റയാന്‍ ഗിഗ്ഗ്‌സിന്റെ മുംബൈ ഫൈവ്‌സിനെ ഒന്നിനെതിരേ നാലു ഗോളുകള്‍ക്ക് കൊച്ചി ഫൈവ്‌സ് തകര്‍ത്തു. ആദ്യ മൂന്നു ക്വാര്‍ട്ടറുകളിലും 1-1നു തുല്യത പാലിച്ച മത്സരത്തില്‍ അവസാന ക്വാര്‍ട്ടറിലെ പോരാട്ട മികവാണ് കൊച്ചിക്ക് വമ്പന്‍ ജയം സമ്മാനിച്ചത്. ഡേവീസ് മോറിസ് ഇരട്ട ഗോളുകള്‍ നേടിയപ്പോള്‍ ഗെക്കാബെര്‍ട്ട്, സാല്‍ഗാഡോ എന്നിവര്‍ ശേഷിച്ച ഗോള്‍ സ്വന്തമാക്കി.

ആദ്യ മത്സരത്തില്‍ വമ്പന്‍ ജയം സ്വന്തമാക്കിയ മുംബൈ മറ്റൊരു ജയം ലക്ഷ്യമിട്ടാണ് കൊച്ചിക്കെതിരേ കളത്തിലിറങ്ങിയത്. എന്നാല്‍ മുംബൈയുടെ സൂപ്പര്‍ താര ടീമിനെ കൂസാതെ കളിക്കാന്‍ കൊച്ചിക്ക് സാധിച്ചു. ഒരേസമയം ആക്രമണത്തിലും പ്രതിരോധത്തിലും മികവ് കാട്ടിയ സാല്‍ഗാഡോയാണ് കൊച്ചിക്ക് ജയം സമ്മാനിക്കുന്നതില്‍ നിര്‍ണായക സ്വാധീനം ചെലുത്തിയത്. എന്നാല്‍ കിട്ടിയ അവസരങ്ങള്‍ മുതലെടുത്ത് മുംബൈ മത്സരത്തില്‍ ലീഡ് നേടുമെന്ന് കരുതിയിരുന്നു. ഗിഗ്ഗ്‌സ് നടത്തിയ മുന്നേറ്റം വലയില്‍ കയറുമെന്ന് കരുതിയെങ്കിലും കൊച്ചി പ്രതിരോധത്തിന്റെ മികവ് താരത്തിന് ഗോള്‍ നിഷേധിക്കുകയായിരുന്നു. തൊട്ടുപിന്നാലെ സാല്‍ഗാഡോയുടെ തകര്‍പ്പനൊരു ഷോട്ട് പോസ്റ്റിനു മുകളിലൂടെ പോയി. രണ്ടാം പകുതിയില്‍ കൊച്ചി പ്രതിരോധത്തിന് മുന്‍തൂക്കം നല്‍കി കളിച്ചപ്പോള്‍ മുംബൈ കൂടുതല്‍ നീക്കങ്ങള്‍ സംഘടിപ്പിച്ചു. ഗിഗ്ഗ്‌സിന്റെ ഒന്നിലധികം നീക്കങ്ങള്‍ സാല്‍ഗാഡോയുടെ മികവിലാണ് കൊച്ചി പ്രതിരോധിച്ചത്. ഫോഗ്ലിയയും ആന്‍ജലോട്ടിന്റെയും ഗോളെന്നുറപ്പിച്ച ഷോട്ട് കൊച്ചിയുടെ ഗോളി കാസലോനെ സേവ് ചെയ്തു. തിരിച്ചടിക്കാന്‍ ലഭിച്ച അവസരങ്ങള്‍ പലതും കൊച്ചിക്ക് മുതലെടുക്കാന്‍ സാധിച്ചില്ല.

എന്നാല്‍ അപ്രതീക്ഷിതമായി ലഭിച്ച പെനാല്‍റ്റിയിലൂടെ കൊച്ചി മൂന്നാം ക്വാര്‍ട്ടറില്‍ മുന്നിലെത്തി. സാല്‍ഗാഡോയെ വീഴ്ത്തിയതിനു ലഭിച്ച പെനാല്‍റ്റി മോറിസ് ലക്ഷ്യത്തിലെത്തിക്കുകയായിരുന്നു. എന്നാല്‍ വൈകാതെ തന്നെ മുംബൈ തിരിച്ചടിച്ചു. ഗിഗ്ഗ്‌സ് നല്‍കിയ പാസ് മുതലെടുത്ത് മുന്നേറിയ ഫോഗ്ലിയ ആന്‍ജലോട്ടിന് പന്ത് കൈമാറി. താരം അനായാസം ലക്ഷ്യം നേടുകയായിരുന്നു. നാലാം ക്വാര്‍ട്ടറിന്റെ തുടക്കത്തില്‍ തന്നെ കൊച്ചി ലീഡെടുത്തു. മോറിസായിരുന്നു സ്‌കോര്‍. തൊട്ടുപിന്നാലെ ഗെക്കാബെര്‍ട്ട്, സാല്‍ഗാഡോ എന്നിവര്‍ ഗോള്‍ നേടിയതോടെ മുംബൈ തോല്‍വി സമ്മതിക്കുകയായിരുന്നു.അതേസമയം രണ്ടാം മത്സരത്തില്‍ ബംഗളൂരു ഫൈവ്‌സ് വമ്പന്‍മാരായ കൊല്‍ക്കത്തയെ 1-1ന് സമനിലയില്‍ കുരുക്കി. ടൂര്‍ണമെന്റിലെ ആദ്യ സമനിലയാണിത്. ആദ്യ മത്സരത്തില്‍ ജയിച്ച കൊല്‍ക്കത്തയ്‌ക്കെതിരേ മികച്ച പ്രതിരോധം പുറത്തെടുത്താണ് ബംഗളൂരു സമനില പിടിച്ചെടുത്തത്. മൂന്നു ക്വാര്‍ട്ടറുകളിലും ആക്രമണം പുറത്തെടുത്ത കൊല്‍ക്കത്തയ്ക്ക് അതേ നാണയത്തില്‍ പ്രതിരോധമൊരുക്കാന്‍ ബംഗളൂരുവിന് സാധിച്ചു. എന്നാല്‍ അവസാന ക്വാര്‍ട്ടറില്‍ കൊല്‍ക്കത്തയ്ക്ക് മികവിലേക്കുയരാനായില്ല.