കാവനൂർ: ജില്ലാ പഞ്ചായത്ത് അനുവദിച്ച 48 ലക്ഷം രൂപ കൊണ്ട് നിർമിച്ച പുതിയ കെട്ടിടത്തിന്റെ ഉദ്ഘാടനം നിർവ്വഹിച്ചതോടെ കാവാനൂർ ഹയർ സെക്കൻഡറി സ്കൂളിന്റെ വർഷങ്ങളായുള്ള  കെട്ടിട ക്ഷാമത്തിന് പരിഹാരമായി. 1974 ൽ സ്ഥാപിച്ച സ്കൂളിന്റെ പഴക്കം ചെന്ന് വീഴാറായ ഓട് കൊണ്ടുള്ള കെട്ടിടം മാറ്റി പുതിയ കെട്ടിടം നിർമിച്ചതോടെ പ്രദേശവാസികളുടെ വർഷങ്ങളായുള്ള ആവശ്യത്തിനാണ് പരിഹാരമായത്.

മലപ്പുറം ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണൻ പുതിയ കെട്ടിടത്തിന്റെ ഉദ്ഘാടനം നിർവ്വഹിച്ചു. ജില്ലാ പഞ്ചായത്ത് സ്കൂളിന് അനുവദിച്ച കുടിവെള്ള പദ്ധതി ഉദ്ഘാടനവും പമ്പ് ഹൗസിന്റെ സ്വിച്ച് ഓൺ കർമ്മവും മലപ്പുറം ജില്ലാ പഞ്ചായത്ത് മെമ്പർ ഇസ്മായീൽ മൂത്തേടം നിർവ്വഹിച്ചു.

ദർശന ചാനലിലെ കുട്ടിക്കുപ്പായം മാപ്പിളപ്പാട്ട് റിയാലിറ്റി ഷോയിൽ സെമി ഫൈനലിലെത്തിയ സ്കൂൾ വിദ്യാർഥി ഫാത്തിമ ഹസനക്ക് അരീക്കോട് ബ്ലോക്ക് പഞ്ചായത്ത് പ്രസിഡന്റ് പി.ലക്ഷമി ഉപഹാരം നൽകി.

മലപ്പുറം ജില്ലാ പഞ്ചായത്ത് വിദ്യാഭ്യാസ സ്റ്റാന്റിംഗ് കമ്മിറ്റി ചെയർമാൻ വി.സുധാകരൻ, കാവനൂർ ഗ്രാമ പഞ്ചായത്ത് പ്രസിഡന്റ് വിദ്യാവതി, വൈസ് പ്രസിഡന്റ് കെ.അഹമ്മദാജി, പ്രിൻസിപ്പൾ കെ.അബ്ദുല്ല, പ്രധാനാധ്യാപിക മായാ ലക്ഷ്മി, പി.ടി.എ പ്രസിഡന്റ് എം.പി സൈതലവി മാസ്റ്റർ, കെ.പി റംല, ശിവൻകുട്ടി, പി.വി ഉസ്മാൻ, സി. ചന്ദ്രൻ, കെ.രാമൻ കുട്ടി, പി.പി അലിബാപ്പു, പ്രദീപ് കുമാർ സംബന്ധിച്ചു.