കൊടുങ്ങല്ലൂര്‍: അഴീക്കോട് അഴിമുഖത്ത് വഴിമാറിവന്ന കപ്പല്‍ ആശങ്ക സൃഷ്ടിച്ചു. വൈകീട്ട് നാലോടെയാണ് ഗ്രേറ്റ് സീ വേമ്പനാട് എന്ന ചെറു കപ്പല്‍ അഴീക്കോട് അഴിമുഖത്ത് പ്രവേശിച്ചത്. അറിയിപ്പില്ലാതെ കപ്പല്‍ കടന്നുവന്നത് അധികാരികളെയും മത്സ്യത്തൊഴിലാളികളെയും ആശങ്കയിലാക്കി. തുടര്‍ന്ന് തീരദേശ പൊലിസ് നടത്തിയ പരിശോധനയില്‍ സാങ്കേതിക തകരാറിനെ തുടര്‍ന്ന് കപ്പല്‍ തീരത്തണഞ്ഞതാണെന്ന് വ്യക്തമായി.
അഴിമുഖത്ത് പ്രവേശിക്കാന്‍ തുറമുഖ വകുപ്പിന്റെ അനുമതി ലഭിച്ചതായും കപ്പല്‍ ജീവനക്കാര്‍ അറിയിച്ചു.
വലിയ കപ്പലുകളില്‍ നിന്നും തുറമുഖത്തേയ്ക്ക് ചരക്കെത്തിക്കുന്ന സപ്ലൈയര്‍ വിഭാഗത്തില്‍ പെട്ട ചെറു കപ്പലാണ് അഴിമുഖത്ത് നങ്കൂരമിട്ടത്.