ചന്തേര സ്റ്റേഷനിലേക്ക് പുതിയ വാഹനമില്ല

ചെറുവത്തൂര്‍: കാലപ്പഴക്കംചെന്ന വാഹനങ്ങള്‍കൊണ്ട് നട്ടംതിരിയുന്ന ചന്തേര പൊലിസ് സ്റ്റേഷനിലേക്ക് പുതിയ വാഹനമില്ല. അറ്റകുറ്റപ്പണി നടത്തി പഴയ ടവേര തന്നെ സ്റ്റേഷനിലേക്ക് തിരികെയെത്തിച്ചു. തള്ളി സ്റ്റാര്‍ട്ട് ചെയ്യേണ്ടി വരുന്ന രണ്ടു വാഹനങ്ങള്‍ കൊണ്ട് പൊലിസുകാര്‍ കഷ്ടപ്പെടുന്ന വാര്‍ത്ത കഴിഞ്ഞ ദിവസം ടസുപ്രഭാതം റിപ്പോര്‍ട്ട് ചെയ്തിരുന്നു.
ഒരു ജീപ്പും ടവേരയുമാണ് ചന്തേര സ്റ്റേഷനില്‍ ഉണ്ടായിരുന്നത്. എന്നാല്‍ ഏതാനും ദിവസം മുന്‍പ് ടവേര ഇവിടെനിന്ന് കൊണ്ടുപോവുകയും ജില്ലാ ഡോഗ് സ്‌ക്വാഡ് ഉപയോഗിച്ചിരുന്ന പഴഞ്ചന്‍ ജീപ്പ് ഇവിടേക്ക് എത്തിക്കുകയും ചെയ്തു. ഇതോടെ രണ്ടു പഴഞ്ചന്‍ വാഹനങ്ങള്‍കൊണ്ട് പൊലിസുകാര്‍ കഷ്ടപ്പെടുകയായിരുന്നു. പൊലിസുകാരുടെ കഷ്ടപ്പാട് വാര്‍ത്തയായത്തോടെ ജില്ലാ പൊലിസ് മേധാവിയുടെ നിര്‍ദേശ പ്രകാരം ഇവിടെ നിന്നും കൊണ്ടുപോയ ടവേര തന്നെ ഇന്നലെ തിരിച്ചെത്തിക്കുകയായിരുന്നു. ഇടയ്ക്കിടെ പണിമുടക്കുന്ന വാഹനമാണ് ടവേരയും. അതിനാല്‍ വാഹനങ്ങള്‍ തള്ളിക്കൊണ്ടുപോകേണ്ട പൊലിസുകാരുടെ ഗതികേടിനു കാര്യമായ മാറ്റം വരാന്‍ സാധ്യതയില്ല.