നാദാപുരം: പുഴയില്‍ അടിഞ്ഞുകൂടിയ മണ്ണും ചളിയും നീക്കം ചെയ്യണമെന്ന നാട്ടുകാരുടെ ആവശ്യം  ഈ വര്‍ഷവും നടപ്പിലായില്ല. ഇതിനാല്‍ പുഴയിലെ ജലസംഭരണ ശേഷി വീണ്ടും കുറഞ്ഞു.
ജലസേചന വകുപ്പിന്റെ കീഴില്‍ വടകരയിലേക്ക് കുടിവെള്ളമെത്തിക്കാന്‍  വിഷ്ണുമംഗലം പുഴയില്‍ പണിത  ബണ്ടിനുള്ളിലാണ് മണ്ണടിഞ്ഞു വെള്ളം കെട്ടിനില്‍ക്കാനുള്ള സ്ഥലത്തിന്റെ അളവ് കുറഞ്ഞു വരുന്നത്. വിഷ്ണുമംഗലം പുഴയില്‍ നിര്‍മിച്ച പമ്പിങ് സ്റ്റേഷനില്‍ നിന്ന് 24 മണിക്കൂറും വെള്ളം പമ്പ് ചെയ്താണ് വടകരയിലേക്കുള്ള കുടിവെള്ള വിതരണം നടത്തുന്നത്. ഇതിനായി നാലു മീറ്റര്‍ ഉയരത്തിലും ആറു മീറ്ററോളം നീളത്തിലും പുഴയ്ക്കു കുറുകെ കൂറ്റന്‍ ബണ്ട് നിര്‍മിച്ചാണ് വെള്ളം ശേഖരിക്കുന്നത്.
ബണ്ടിന്റെ കാല്‍ഭാഗത്തോളം ഇപ്പോള്‍ മണ്ണടിഞ്ഞു കിടക്കുകയാണ്. മഴവെള്ളത്തോടൊപ്പം ഒലിച്ചിറങ്ങി വരുന്ന മണ്ണ് ബണ്ടിന് പുറത്തേക്കു പോകാന്‍ സംവിധാനമില്ലാത്തതിനാല്‍ ഇവിടെ അടിഞ്ഞുകൂടുകയാണ്. സമീപത്തെ വീടുകളിലെ കിണറുകളിലെ വെള്ളം കുറയുന്നതായും പരാതി ഉയര്‍ന്നിട്ടുണ്ട്. പുഴയിലെ മണ്ണ് നീക്കണമെന്ന വര്‍ഷങ്ങളായുള്ള നാട്ടുകാരുടെ ആവശ്യത്തിനു ഈ വര്‍ഷവും അധികൃതര്‍ പുല്ലുവിലയാണ് കല്‍പ്പിച്ചത്.
വരള്‍ച്ച മുന്നില്‍കണ്ട് നേരത്തെ തന്നെ ബണ്ടിനോട് ചേര്‍ന്നു നിര്‍മിച്ച കനാലിന്റെ ഷട്ടര്‍ ഉയര്‍ത്തുകയായിരുന്നു. വേനല്‍ കനത്തതോടെ പുഴയിലെ ജലനിരപ്പ് കുറഞ്ഞുവരികയാണ്. കഴിഞ്ഞ വര്‍ഷം  പുഴ പൂര്‍ണമായും വറ്റിവരണ്ട് പമ്പിങ് നിര്‍ത്തി വയ്ക്കുകയായിരുന്നു. വേനല്‍ച്ചൂട് തുടര്‍ന്നാല്‍ പുഴ പൂര്‍ണമായും വറ്റിവരളും.