ലഖ്‌നോ: 2004 മറക്കരുതെന്ന് ബി.ജെ.പിയോട് യു.പി.എ അധ്യക്ഷ സോണിയാഗാന്ധി. 2004 ലെ പൊതുതെരഞ്ഞെടുപ്പ് വരുമ്പോള്‍ ബി.ജെ.പിയുടെ പ്രധാനമന്ത്രി സ്ഥാനാര്‍ഥി അടല്‍ ബിഹാരി വാജ്‌പേയി കരുത്തനും അജയ്യനുമായിരുന്നു. പക്ഷേ, കോണ്‍ഗ്രസ് വിജയിച്ചു- സോണിയ പറഞ്ഞു. റായ്ബറേലിയിലെ കോണ്‍ഗ്രസ് സ്ഥാനാര്‍ഥിയായ സോണിയ, ഇന്നലെ നാമനിര്‍ദേശ പത്രിക സമര്‍പ്പിച്ച ശേഷം മാധ്യമപ്രവര്‍ത്തകരുമായി സംസാരിക്കുകയായിരുന്നു.
മോദി അജയ്യനാണെന്നു കരുതുന്നുണ്ടോയെന്നായിരുന്നു മാധ്യമപ്രവര്‍ത്തകരുടെ ചോദ്യം. റായ്ബറേലിയിലെ ജനങ്ങള്‍ ഇതുവരെ എന്നെ സ്‌നേഹത്തോടെ സ്വീകരിച്ചിട്ടുണ്ട്. ഇനിയും സ്വീകരിക്കും. മോദിക്കുള്ള ഉത്തരം വോട്ടര്‍മാര്‍ നല്‍കുമെന്നും സോണിയ പറഞ്ഞു.

പിന്നീട് ഇടപെട്ട രാഹുലും മോദിക്കെതിരേ ആഞ്ഞടിച്ചു. തങ്ങളുടെ ധാര്‍ഷ്ട്യം കൊണ്ട് അജയ്യരാണെന്നു കരുതിയ നിരവധിയാളുകള്‍ ചരിത്രത്തില്‍ ഉണ്ടായിട്ടുണ്ട്. ഇന്ത്യയിലെ ജനങ്ങളെക്കാള്‍ വലിയവരാണു തങ്ങളെന്നാണ് ചിലരുടെ ചിന്ത. പക്ഷേ, ജനാധിപത്യത്തില്‍ ജനങ്ങളാണ് പരമാധികാരികള്‍ എന്ന് അത്തരം ആളുകള്‍ തിരിച്ചറിയുന്നില്ല.
മോദിയുടെ അജയ്യതയും കരുത്തും ഈ തെരഞ്ഞെടുപ്പില്‍ വെളിപ്പെടും- രാഹുല്‍ പറഞ്ഞു. അതേസമയം, വന്‍ ജനപങ്കാളിത്തത്തോടെ റോഡ് ഷോ നടത്തിയാണ് സോണിയാ ഗാന്ധി പത്രിക സമര്‍പ്പിക്കാനെത്തിയത്.

മക്കളായ പ്രിയങ്കയ്ക്കും രാഹുലിനും മരുമകന്‍ റോബര്‍ട്ട് വാദ്രയ്ക്കുമൊപ്പം കോണ്‍ഗ്രസ് ഓഫിസില്‍ പൂജ നടത്തിയ ശേഷമായിരുന്നു പത്രികാ സമര്‍പ്പണത്തിനു പുറപ്പെട്ടത്.
അഞ്ചാം തവണയാണ് സോണിയ റായ്ബറേലിയില്‍ ജനവിധി തേടുന്നത്. കോണ്‍ഗ്രസ് നിന്നും ബി.ജെ.പിയിലെത്തിയ ദിനേശ് പ്രതാപാണ് എതിര്‍ സ്ഥാനാര്‍ഥി. അമേത്തിയില്‍ മത്സരിക്കുന്ന രാഹുല്‍ ഗാന്ധി കഴിഞ്ഞദിവസം നാമനിര്‍ദേശ പത്രിക സമര്‍പ്പിച്ചിരുന്നു.
സോണിയയും രാഹുലും മത്സരിക്കുന്ന മണ്ഡലങ്ങളില്‍ എസ്.പി- ബി.എസ്.പി മുന്നണി സ്ഥാനാര്‍ഥിയെ നിര്‍ത്തിയിട്ടില്ല. അടുത്തമാസം ആറിന് അഞ്ചാംഘട്ടത്തിലാണ് മണ്ഡലത്തില്‍ വോട്ടെടുപ്പ് നടക്കുന്നത്.

കഴിഞ്ഞ തെരഞ്ഞെടുപ്പില്‍ മൂന്നരലക്ഷത്തിലേറെ വോട്ടുകള്‍ക്കാണ് സോണിയ ഇവിടെ നിന്നു വിജയിച്ചത്.