നെടുമ്പാശ്ശേരി: കൊവിഡ് വ്യാപനത്തിന്റെ സാഹചര്യത്തില്‍ തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് നടത്തുകയെന്നത് സംസ്ഥാന തെരഞ്ഞെടുപ്പ് കമ്മിഷന് കടുത്ത വെല്ലുവിളിയാകുന്നു. 

ഒക്ടോബര്‍ മാസത്തില്‍ തെരഞ്ഞെടുപ്പ് നടത്തി നവംബര്‍ 12 ന് മുന്‍പായി പുതിയ ഭരണസമിതികള്‍ അധികാരത്തില്‍ വരണം. എന്നാല്‍ കൊവിഡ് രോഗവ്യാപനം തടയാനാകാത്ത സാഹചര്യമാണ് കമ്മിഷനെ ആശയക്കുഴപ്പത്തിലാക്കുന്നത്. ഇതു കണക്കിലെടുത്താണ് തെരഞ്ഞെടുപ്പ് നടത്തുന്നത് സംബന്ധിച്ച നിര്‍ദേശങ്ങള്‍ ആരായാന്‍ ഉന്നത ആരോഗ്യ പ്രവര്‍ത്തകരുടെ യോഗം വിളിക്കാന്‍ കമ്മിഷന്‍ തീരുമാനിച്ചത്. ആദ്യഘട്ടത്തില്‍ തെരഞ്ഞെടുപ്പിനുള്ള പ്രാഥമിക നടപടിക്രമങ്ങളുമായി കമ്മിഷന്‍ മുന്നോട്ടു പോയിരുന്നു. ഇതിനായി വോട്ടര്‍പട്ടിക പുതുക്കുന്നതിനുള്ള നടപടികളും സ്വീകരിച്ചു. എന്നാല്‍ ഇതിനു ശേഷമാണ് കൊവിഡ് കേരളത്തില്‍ വ്യാപകമായത്. 

  65 വയസ് കഴിഞ്ഞവര്‍ക്ക് തപാല്‍ വോട്ട് രേഖപ്പെടുത്താനുള്ള സൗകര്യം ഒരുക്കാമെന്ന നിര്‍ദേശം സംസ്ഥാന തെരഞ്ഞെടുപ്പ് കമ്മിഷന്‍ കേന്ദ്ര തെരഞ്ഞെടുപ്പ് കമ്മിഷന് മുന്‍പില്‍ സമര്‍പ്പിച്ചിരുന്നു. ഇക്കാര്യം കേന്ദ്ര കമ്മിഷന്‍ തത്വത്തില്‍ അംഗീകരിക്കുകയും തെരഞ്ഞെടുപ്പ് ചട്ടങ്ങള്‍ പരിഷ്‌കരിച്ച് കഴിഞ്ഞ മാസം 19 ന് നിയമ മന്ത്രാലയം പുറത്തിറക്കിയ വിജ്ഞാപനത്തില്‍ ഇക്കാര്യം ഉള്‍പ്പെടുത്തുകയും ചെയ്തിരുന്നു. എന്നാല്‍ ബീഹാര്‍ നിയമസഭാ തെരഞ്ഞെടുപ്പ് നടക്കാനുള്ള സാഹചര്യം ഉള്‍പ്പടെ മുന്‍നിര്‍ത്തി കോണ്‍ഗ്രസ് അടക്കമുള്ള പ്രധാന പ്രതിപക്ഷ കക്ഷികള്‍ ഈ നിര്‍ദേശത്തിനെതിരേ ശക്തമായി രംഗത്തു വന്നു. ഇതേതുടര്‍ന്ന് തീരുമാനം തല്‍ക്കാലം നടപ്പാക്കേണ്ടതില്ലെന്നാണ് കേന്ദ്ര കമ്മിഷന്റെ തീരുമാനമെന്നാണ് അറിയുന്നത്. 

 കൊവിഡ് രോഗവ്യാപനത്തിന്റെ ഇപ്പോഴത്തെ കണക്കനുസരിച്ച് ഒക്ടോബര്‍ ആകുമ്പോഴേയ്ക്കും സംസ്ഥാനത്ത് അതീവ ഗുരുതരമായ സ്ഥിതിവിശേഷം ഉണ്ടാകുമെന്നാണ് വിലയിരുത്തല്‍. തെരഞ്ഞെടുപ്പ് പ്രഖ്യാപിച്ചാല്‍ പ്രചാരണങ്ങളില്‍ അടക്കം കര്‍ശനമായ നിയന്ത്രണങ്ങള്‍ ഏര്‍പ്പെടുത്താന്‍ തീരുമാനിച്ചാലും പിന്നെയും കടമ്പകള്‍ നിരവധിയാണ്. മാത്രമല്ല തെരഞ്ഞെടുപ്പിലേക്ക് അടുക്കുന്നതോടെ കടുത്ത നിയന്ത്രണങ്ങള്‍ രാഷ്ട്രീയ പാര്‍ട്ടികള്‍ എത്രമാത്രം പാലിക്കുമെന്നതും മുന്‍കൂട്ടി പറയാനാകില്ല. 

 ഇപ്പോഴത്തെ സാഹചര്യത്തില്‍ തെരഞ്ഞെടുപ്പില്‍ വോട്ടിങ് മെഷീന്‍ ഉപയോഗിക്കുന്നതും പ്രായോഗികമല്ലെന്നാണ് വിലയിരുത്തല്‍. ഓരോരുത്തരും വോട്ട് ചെയ്തു കഴിയുമ്പോള്‍ മെഷീനിലെ ബട്ടണുകള്‍ സാനിറ്റൈസര്‍ ഉപയോഗിച്ച് അണുവിമുക്തമാക്കേണ്ടി വരും. ബാലറ്റ് പേപ്പര്‍ ഉപയോഗിച്ച് തെരഞ്ഞെടുപ്പ് നടത്തുന്നതിനെ കുറിച്ചും കമ്മിഷന്‍ ഗൗരവമായി ആലോചിക്കുന്നുണ്ട്.