കരുവാരകുണ്ട് (മലപ്പുറം): ആലപ്പുഴ അരൂരിലെ എരമല്ലൂരിലുണ്ടായ കാറപകടത്തില്‍ കരുവാരകുണ്ട് സ്വദേശികളായ മാതാവും മകനും മരിച്ചു. പുന്നക്കാട് പൂളക്കുന്നത്ത് പരേതനായ കുന്നത്ത് മൊയ്തീന്‍ കോയയുടെ ഭാര്യ ഫാത്തിമ(49), മകന്‍ സിറാജ് (30) എന്നിവരാണ് മരിച്ചത്. സിറാജിന്റെ ഭാര്യ ഷിഫ്‌നയ്ക്ക് പരുക്കേറ്റു. കാറിലുണ്ടായിരുന്ന സിറാജിന്റെ സഹോദരങ്ങളായ നിഷാദ്, ഇര്‍ഷാദ് എന്നിവര്‍ പരുക്കേല്‍ക്കാതെ രക്ഷപ്പെട്ടു. തിരുവനന്തപുരത്തുള്ള നിഷാദിന്റെ സുഹൃത്തിന്റെ വീട്ടില്‍പോയി മടങ്ങിവരുമ്പോള്‍ ഇന്നലെ പുലര്‍ച്ചെ നാലരയോടെയാണ് അപകടം. റോഡില്‍ നിര്‍ത്തിയിട്ട ബസിനു പിറകില്‍ ഇവര്‍ സഞ്ചരിച്ച കാറിടിക്കുകയായിരുന്നുവെന്ന് ദൃക്‌സാക്ഷികള്‍ പറഞ്ഞു. സിറാജ് സംഭവസ്ഥലത്തുവച്ചും ഫാത്തിമ സ്വകാര്യ ആശുപത്രിയിലുമാണ് മരിച്ചത്. ഇടിയില്‍ കാറിന്റെ മുന്‍ഭാഗം പൂര്‍ണമായും തകര്‍ന്നു.