ജിദ്ദ: സഊദിയിൽ വിവിധ മേഖലകളിലെ പ്രധാാനപ്പെട്ട അഞ്ച് തൊഴിൽ മേഖലകളിലായി 45,600 ജോലികൾ ഇതിനകം സഊദിവത്ക്കരണം നടത്തിയതായി മാനവശേഷി, സാമൂഹിക വികസന മന്ത്രാലയം അറിയിച്ചു. ഈ മേഖലയിൽ 2020 ഓടെ 1,24,000 തൊഴിലുകൾ സഊദിവൽക്കരിക്കാനാണ് ലക്ഷ്യമിടുന്നത്. ഇതിന്റെ 40 ശതമാനം ഇതിനകം സാക്ഷാൽക്കരിച്ചു. 60 ശതമാനം കൂടിയാണ് ശേഷിക്കുന്നത്. ഓപറേഷൻസ്, മെയിന്റനൻസ് മേഖലയിലെ പ്രൊഫഷനൽ തൊഴിലുകൾ, ദന്ത ഡോക്ടർ പ്രൊഫഷൻ, ഫാർമസി, എൻജിനീയറിംഗ്, അക്കൗണ്ടിംഗ്, ഓഡിറ്റിംഗ് പ്രൊഫഷനുകളിൽ പെട്ട തൊഴിൽ മേഖലകളിലായി ആകെ 1,24,000 തൊഴിലുകൾ സഊദിവൽക്കരിക്കാനാണ് ലക്ഷ്യമിടുന്നത്.
കൊറോണ കാലത്ത് സ്വകാര്യ മേഖലയിൽ സഊദികളുടെ തൊഴിൽ സുരക്ഷ ഉറപ്പു വരുത്താൻ സർക്കാർ പ്രത്യേക ശ്രദ്ധ കാണിച്ചിരുന്നു. സ്വകാര്യ മേഖലയിലെ സഊദി ജീവനക്കാരുടെ വേതനം ജനറൽ ഓർഗനൈസേഷൻ ഓഫ് സോഷ്യൽ ഇൻഷുറൻസിനു (ഗോസി) കീഴിലെ സാനിദ് പദ്ധതി വഴി വിതരണം ചെയ്യുന്ന പദ്ധതി തുടക്കത്തിൽ മൂന്നു മാസത്തേക്കാണ് പ്രഖ്യാപിച്ചത്. ഇത് പിന്നീട് ദീർഘിപ്പിച്ചു.
കൊറോണ ഏറ്റവുമധികം പ്രതികൂലമായി ബാധിച്ച സ്വകാര്യ സ്ഥാപനങ്ങളിലെ 70 ശതമാനം സഊദി ജീവനക്കാർക്കും കൊറോണ കുറഞ്ഞ തോതിൽ ബാധിച്ച സ്വകാര്യ സ്ഥാപനങ്ങളിലെ 50 ശതാനം ദി ജീവനക്കാർക്കുമാണ് സെപ്റ്റംബറിൽ ധനസഹായം വിതരണം ചെയ്യുകയെന്ന് ഗോസി അറിയിച്ചിട്ടുണ്ട്. നേരത്തേ മുതലുള്ള സംവിധാനം അനുസരിച്ച് ഓഗസ്റ്റിൽ ധനസഹായം വിതരണം ചെയ്യും. നിലവിൽ സാനിദ് പദ്ധതിയിൽ രജിസ്റ്റർ ചെയ്ത മുഴുവൻ ഗുണഭോക്താക്കൾക്കും ഓഗസ്റ്റിൽ നിശ്ചിത അനുപാതത്തിൽ ധനസഹായം വിതരണം ചെയ്യുമെന്നും ഗോസി പറഞ്ഞു.