സ്വന്തം ലേഖകന്‍
പാലക്കാട്: ആദിമനിവാസികളും ഗുഹാമനുഷ്യരുമായ ചോലനായ്ക്കരുടെ ഭാഷയെക്കുറിച്ച് ആദ്യമായി ആധികാരിക പഠനം നടത്തിയ മഞ്ചേരി സ്വദേശിനി കെ.ടി ലിജിഷക്ക് ഡോക്ടറേറ്റ്. മാസങ്ങള്‍ നീണ്ട പഠനത്തിനു ശേഷമാണ് ലിജിഷക്ക് മലയാളം സര്‍വകലാശാലയില്‍ നിന്നും ഡോക്ടറേറ്റ് ലഭിച്ചത്. പ്രകൃതിയോട് ഇണങ്ങി കഴിയുന്ന ചോലനായ്ക്കരെക്കുറിച്ചു കേരളത്തില്‍ ഇതുവരെ കാര്യമായ പഠനങ്ങളൊന്നും നടന്നിട്ടില്ല. ലിപിയില്ലാത്ത ചോലനായ്ക്ക ഭാഷയാണ് ഇവര്‍ സംസാരിക്കുന്നത്. കന്നട, തുളു, തോട, കോട തുടങ്ങിയ ദ്രാവിഡ്രഭാഷകളുമായി ഏറെ ബന്ധമുണ്ടെങ്കിലും ഇതൊരു സ്വതന്ത്ര ഭാഷയാണ്.
തുഞ്ചത്തെഴുത്തച്ഛന്‍ മലയാള സര്‍വകലാശാലയിലെ ഗവേഷണ വിദ്യാര്‍ഥിനിയായിരുന്ന ലിജിഷ ആന്ത്രപോളജിസ്റ്റും ഭാഷാശാസ്ത്രജ്ഞനുമായ പ്രൊഫ.എം ശ്രീനാഥന്റെ മാര്‍ഗനിര്‍ദേശത്തിലാണ് ഗവേഷണ പ്രബന്ധം പൂര്‍ത്തിയാക്കിയിരിക്കുന്നത്.
കേരളത്തിലെ അഞ്ച് പ്രാക്തന ഗോത്രവര്‍ഗങ്ങളില്‍ ഏറ്റവും പഴക്കമുള്ളതും അതിവേഗം വംശനാശ ഭീഷണി നേരിട്ടുകൊണ്ടിരിക്കുകയും ചെയ്യുന്ന ചോലനായ്ക്കര്‍ പശ്ചിമഘട്ടത്തിലെ ചോലവനങ്ങള്‍ക്കുള്ളിലെ ഗുഹകളിലും പാറകള്‍ക്കിടയിലെ അളകളിലുമാണ് താമസിക്കുന്നത്. കിഴങ്ങുകളും തേനും മാംസാഹാരവും കഴിച്ചു ജീവിക്കുന്ന, പ്രകൃതിയോട് ഏറെ ഇണങ്ങിക്കഴിയുന്ന ചോലനായ്ക്കര്‍ കഴിഞ്ഞ കുറേ വര്‍ഷങ്ങളായി നാട്ടിലേക്കിറങ്ങുകയും മുഖ്യധാര സമൂഹവുമായി സമ്പര്‍ക്കം പുലര്‍ത്തുകയും ചെയ്യുന്നുണ്ട്.
മാവോയിസ്റ്റ് സാന്നിധ്യവും വന്യമൃഗങ്ങളുടെ ശല്യം രൂക്ഷമായതുമായ പ്രദേശങ്ങളായതിനാല്‍ വനം വകുപ്പിന്റേയും പൊലിസിന്റേയും കടുത്ത നിയന്ത്രണങ്ങള്‍ പാലിച്ചുകൊണ്ടാണ് ലിജിഷ വിവരശേഖരണം നടത്തിയിരുന്നത്. ഉള്‍വനങ്ങളിലേക്കെത്തിപ്പെടാനും ആവേദകരെ കണ്ടെത്താനും ഏറെ പരിശ്രമിക്കേണ്ടി വന്നു. ആദ്യകാലങ്ങളില്‍ വിമുഖത കാണിച്ചിരുന്ന ഗോത്രാംഗങ്ങള്‍ പിന്നീട് സൗഹൃദത്തോടെ വിവരങ്ങള്‍ നല്‍കുകയായിരുന്നുവെന്നും ലിജിഷ പറയുന്നു. ആനുകാലികങ്ങളില്‍ ചെറുകഥകളും ശാസ്ത്രലേഖനങ്ങളും എഴുതാറുള്ള ലിജിഷ കാവനൂര്‍ മാടാരുകുണ്ടില്‍ കെ ഏകാമ്പരന്റെയും ലീലയുടെയും മകളാണ്. പാവാട, വാഴ്വാധാരം എന്നിങ്ങനെ രണ്ടു കഥാസമാഹരങ്ങള്‍ പ്രസിദ്ധീകരിച്ചിട്ടുണ്ട്. ചെറുകഥകള്‍ക്ക് നിരവധി അവാര്‍ഡുകള്‍ കരസ്ഥമാക്കിയിട്ടുള്ള ലിജിഷ 2019 ല്‍ കേരള കലാകേന്ദ്രയുടെ കമല സുരയ്യ പുരസ്‌കാരവും നേടിയിട്ടുണ്ട്.