നോട്ടിങ്ഹാം: ഇംഗ്ലണ്ടിനെതിരായ ഒന്നാം ഏകദിന മത്സരത്തില്‍ ഇന്ത്യക്ക് എട്ട് വിക്കറ്റിന്റെ തകര്‍പ്പന്‍ ജയം. ആദ്യം ബാറ്റ് ചെയ്ത ഇംഗ്ലണ്ടിനെ 268 റണ്‍സില്‍ ഒതുക്കിയ ഇന്ത്യ 40.1 ഓവറില്‍ രണ്ട് വിക്കറ്റ് നഷ്ടത്തില്‍ ലക്ഷ്യത്തിലെത്തി.
സെഞ്ചുറി നേടി പുറത്താവാതെ നിന്ന രോഹിത് ശര്‍മയാണ് (137) ഇന്ത്യയെ അനായാസവിജയത്തിലെത്തിച്ചത്. 82 പന്തില്‍ 75 റണ്‍സുമായി ക്യാപ്റ്റന്‍ വിരാട് കോഹ്‌ലി രോഹിത്തിന് മികച്ച പിന്തുണ നല്‍കി. 114 പന്തില്‍ 15 ഫോറും നാല് സിക്‌സറുകളുമടങ്ങിയതാണ് രോഹിത്തിന്റെ ഇന്നിങ്‌സ്.
ധവാന്റെയും കോഹ്‌ലിയുടെയും വിക്കറ്റാണ് ഇന്ത്യക്ക് നഷ്ടമായത്. ധവാന്‍ 27 പന്തില്‍ 40 റണ്‍സ് നേടി. 10 ഓവറില്‍ 25 റണ്‍സ് വഴങ്ങി 6 വിക്കറ്റ് വീഴ്ത്തിയ കുല്‍ദീപ് യാദവിന്റെ മികച്ച ബൗളിങ്ങിലായിരുന്നു ഇന്ത്യ ഇംഗ്ലണ്ടിനെ 268 റണ്‍സില്‍ ഒതുക്കിയത്. പരമ്പരയിലെ രണ്ടാം മത്സരം ഇന്ന് വൈകിട്ട് 3.30ന് ലണ്ടനിലെ ലോര്‍ഡ്‌സ് സ്റ്റേഡിയത്തില്‍ നടക്കും.