നോര്‍ത്ത്, സൗത്ത് ഡിവിഷനുകളിലെ 26 ജീവനക്കാരെയാണ് സ്ഥലം മാറ്റി ഉത്തരവിറക്കിയത്
നിലമ്പൂര്‍: മാനദണ്ഡങ്ങള്‍ ലംഘിച്ച് വനംവകുപ്പ് ജീവനക്കാരെ സ്ഥലംമാറ്റിയതായി ആക്ഷേപം.  ബീറ്റ് ഫോറസ്റ്റ് ഓഫിസര്‍മാരെ സ്ഥലം മാറ്റിയുള്ള ഉത്തരവ് ഇന്നലെയാണ് പുറത്തിറങ്ങിയത്. നിലമ്പൂര്‍ വനം നോര്‍ത്ത് ഡി.എഫ്.ഒ ഡോ. ആടല്‍ അരശനാണ്, നോര്‍ത്ത്, സൗത്ത് ഡിവിഷനുകളിലെ 26 ജീവനക്കാരെ സ്ഥലം മാറ്റി ഉത്തരവിറക്കിയത്. നിലവില്‍ ജോലി സ്ഥലത്ത് ഒരുവര്‍ഷം പൂര്‍ത്തിയാക്കിയവരുള്‍പ്പെടെ സ്ഥലം മാറ്റിയ പട്ടികയിലുണ്ട്.
അതേസയമം നാലും അഞ്ചും വര്‍ഷം പൂര്‍ത്തിയാക്കി ഇപ്പോഴും ജോലി സ്ഥലത്ത് തുടരുന്ന ജീവനക്കാര്‍  സ്ഥലംമാറ്റത്തിന് അപേക്ഷ നല്‍കിയിട്ടും അത് പരിഗണിച്ചിട്ടുമില്ല. മാവോയിസ്റ്റ് ഭീഷണിയുമായി ബന്ധപ്പെട്ട് പടുക്ക ഫോറസ്റ്റ് സ്‌റ്റേഷന്‍ പരിധിയിലെ മൂന്നുവര്‍ഷം പൂര്‍ത്തിയാക്കിയ പല ജീവനക്കാരും  സ്ഥലംമാറ്റത്തിന് അപേക്ഷ നല്‍കിയെങ്കിലും പലര്‍ക്കും സ്ഥലം മാറ്റം നല്‍കിയില്ല. കഴിഞ്ഞ ദിവസം പുറത്തിറങ്ങിയ സെക്ഷന്‍ ഫോറസ്റ്റ് ഓഫിസര്‍മാരുടെ സ്ഥലംമാറ്റത്തിലും മാനദണ്ഡങ്ങള്‍ പാലിച്ചിട്ടില്ല.
വര്‍ഷങ്ങളായി ഡിപ്പോകളിലും മറ്റും തുടരുന്ന ജീവനക്കാരില്‍ ചിലരും പട്ടികയില്‍ വന്നിട്ടില്ല. ഫ്‌ളയിങ് സ്‌ക്വാഡിലും മറ്റും ഒരുവര്‍ഷം പോലും പൂര്‍ത്തിയാകാത്ത ജീവനക്കാരെയും സ്ഥലം മാറ്റിയിട്ടുണ്ട്. പാലക്കാട് സി.സി.എഫിനാണ് സെക്ഷന്‍ ഫോറസ്റ്റ് ഓഫിസര്‍മാരെ സ്ഥലംമാറ്റാനുള്ള അധികാരമുള്ളത് എന്നിരിക്കെ രാഷ്ട്രീയ സമ്മര്‍ദ്ദമാണ് സ്ഥലം മാറ്റത്തിനു പിന്നിലെന്ന് സംശയിക്കുന്നു. ഡെപ്യൂട്ടി റെയ്ഞ്ചര്‍മാരുടെ സ്ഥലം മാറ്റം അടുത്ത ദിവസം പുറത്തിറങ്ങും.