മൂവാറ്റുപുഴ (എറണാകുളം): ശബരിമല തീര്‍ഥാടക സംഘം സഞ്ചരിച്ച കാറും ടോറസ് ലോറിയും കൂട്ടിയിടിച്ച് ഒരാള്‍ മരിച്ചു. മൂന്നുപേര്‍ക്കു പരുക്കേറ്റു. കണ്ണൂര്‍ ശ്രീകണ്ഠപുരം കാഞ്ഞിലേരി ബാലങ്കരിയിലെ കണിയേരിയില്‍ രാജേഷ് (43) ആണ് മരിച്ചത്. സഹയാത്രകരായ ബാലങ്കരിയിലെ ലിജിലാല്‍ (30), ധനേഷ് (29), രജീഷ് (30) എന്നിവര്‍ക്കു പരുക്കേറ്റു. എം.സി റോഡില്‍ ആറൂര്‍ കനാല്‍പാലത്തില്‍ ബുധനാഴ്ച അര്‍ധരാത്രി 12ഓടെയായിരുന്നു അപകടം. ശബരിമലയ്ക്കു പോവുകയായിരുന്ന സംഘം സഞ്ചരിച്ച കാര്‍ എതിരെ വന്ന ടോറസ് ഇടിക്കുകയായിരുന്നു. കോണ്‍ക്രീറ്റ് തൊഴിലാളിയാണു മരിച്ച രാജേഷ്. ബാലങ്കരിയിലെ പരേതനായ നാരായണന്റെയും ദേവിയുടെയും മകനാണ്. ഭാര്യ: സത്യഭാമ. മക്കള്‍: അനശ്വര്‍ (പത്താംക്ലാസ് വിദ്യാര്‍ഥി, മടമ്പം മേരിലാന്‍ഡ് ഹയര്‍ സെക്കന്‍ഡറി സ്‌കൂള്‍), തീര്‍ഥ (ആറാംക്ലാസ് വിദ്യാര്‍ഥി, കാഞ്ഞിലേരി യു.പി സ്‌കൂള്‍). സഹോദരി: ശൈലജ (മുംബൈ). സംസ്‌ക്കാരം ഉച്ചകഴിഞ്ഞ് കാഞ്ഞിലേരിയില്‍.