മുക്കം: 2022 ലെ ഖത്തര്‍ ഫുട്‌ബോള്‍ ലോകകപ്പിന്റെ ഭാഗമായി സംഘടിപ്പിക്കുന്ന ജനറേഷന്‍ അമേസിങ് പരിശീലന പരിപാടിയുടെ കേരളത്തിലെ ലോഞ്ചിങ് നാളെ കാരശ്ശേരി പഞ്ചായത്തിലെ ഗോതമ്പ റോഡില്‍ നടക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.
ഫുട്‌ബോളിലൂടെ യുവജനങ്ങള്‍ക്കിടയില്‍ സാമൂഹിക ക്ഷമത വര്‍ധിപ്പിക്കാന്‍ ഉതകുന്ന പരിപാടികള്‍ ആണ് പദ്ധതിയിലൂടെ നടപ്പാക്കാന്‍ ലക്ഷ്യമിടുന്നത്. എല്ലാ തലത്തിലുമുള്ള ജനങ്ങളെയും ഉള്‍ക്കൊള്ളുന്ന രീതിയിലാണ് പരിപാടി ആവിഷ്‌കരിച്ചിരിക്കുന്നത്. ബ്രസീല്‍, ജോര്‍ദാന്‍, ലബനാന്‍, നേപ്പാള്‍, പാക്കിസ്ഥാന്‍, ഖത്തര്‍, സൗത്ത് ആഫ്രിക്ക, സിറിയ എന്നീ രാജ്യങ്ങളില്‍ നടപ്പിലാക്കിയ പദ്ധതി ഇന്ത്യയില്‍ പ്രചരിപ്പിക്കുന്നതിന്റെ ഭാഗമായാണ് നാളെ ഗോതമ്പ റോഡില്‍ പരിപാടി സംഘടിപ്പിക്കുന്നതെന്നും ഭാരവാഹികള്‍ വ്യക്തമാക്കി.
ഖത്തര്‍ ലോകകപ്പ് നടത്തിപ്പുകാരായ സുപ്രീം കമ്മിറ്റി ഫോര്‍ ഡെലിവറി ആന്‍ഡ് ലെഗസിയുടെ സഹകരണത്തോടെയാണ് പരിപാടി സംഘടിപ്പിക്കുന്നത്. പത്തിനും പതിനഞ്ചിനും ഇടയില്‍ പ്രായമുള്ള തെരഞ്ഞെടുക്കപ്പെട്ട 40 കുട്ടികള്‍ക്കും എട്ടു പരിശീലകര്‍ക്കുമാണ് ആദ്യഘട്ടത്തില്‍ പരിശീലനം നല്‍കുക.
പിന്നീട് സമൂഹത്തിലെ വിവിധ മേഖലയിലുള്ളവരെയും പരിപാടിയുടെ ഭാഗമാക്കും. ജനറേഷന്‍ അമേസിങ് വര്‍ക്കേഴ്‌സ് അംബാസഡര്‍മാരായ സി.പി സാദിഖ് റഹ്മാന്‍, നാജിഹ് കുനിയില്‍ എന്നിവരാണ് പരിശീലന പരിപാടിക്ക് നേതൃത്വം നല്‍കുക. നാളെ രാവിലെ എട്ടിന് എ.എം.ഐ ഗ്രൗണ്ടില്‍ നടക്കുന്ന പരിപാടിയില്‍ പ്രമുഖര്‍ സംബന്ധിക്കുമെന്നും സംഘാടകര്‍ പറഞ്ഞു.
വാര്‍ത്താസമ്മേളനത്തില്‍ സി.പി സാദിഖ് റഹ്മാന്‍, നാജിഹ് കുനിയില്‍, തണല്‍ വെല്‍ഫയര്‍ സൊസൈറ്റി പ്രതിനിധികളായ സാലിം ജീറോഡ്, ശിഹാബുല്‍ ഹഖ്, ബാവ പവര്‍ വേള്‍ഡ് സംബന്ധിച്ചു.