പയ്യോളി: വടകര ഇരിങ്ങല്‍ കോട്ടക്കല്‍ കുഞ്ഞാലിമരക്കാര്‍ പൈതൃക മ്യൂസിയം വികസിപ്പിക്കാന്‍ നടപടി സ്വീകരിക്കുമെന്ന് തുറമുഖം പുരാവസ്തു വകുപ്പ് മന്ത്രി രാമചന്ദ്രന്‍ കടന്നപ്പള്ളി. ഇരിങ്ങല്‍ സര്‍ഗാലയയില്‍ പുരാവസ്തു വകുപ്പ് സംഘടിപ്പിച്ച 'കുഞ്ഞാലിമരക്കാര്‍ സ്മാരക മ്യൂസിയം വികസനം' ചരിത്ര സെമിനാര്‍ ഉദ്ഘാടനം ചെയ്യുകയായിരുന്നു അദ്ദേഹം.
കുഞ്ഞാലിമരക്കാര്‍ക്കായി വിപുലമായ രീതിയില്‍ പൈതൃക മ്യൂസിയം നിര്‍മിക്കുന്നതിന് കൂടുതല്‍ സ്ഥലം ഏറ്റെടുക്കാനുള്ള പ്രവര്‍ത്തനങ്ങള്‍ ഊര്‍ജിതമാക്കും. കുഞ്ഞാലിമരക്കാര്‍ ദിനാചരണം പഴശ്ശിരാജ ദിനം പോലെ വര്‍ഷാവര്‍ഷം ആചരിക്കാന്‍ ചരിത്രപണ്ഡിതന്മാരുമായി ആലോചിച്ച് തീരുമാനമെടുക്കുമെന്നും മന്ത്രി അറിയിച്ചു.
നാല് കുഞ്ഞാലിമാരില്‍ ആരുടെ ദിനാചരണമാണ് നടത്തേണ്ടതെന്ന് തീരുമാനമെടുക്കും. ചരിത്രത്തില്‍ ഒരുപാട് പേര്‍ മനസില്‍ പതിയേണ്ടവരുണ്ടെന്നും അതിലൊരു പടനായകനാണ് കുഞ്ഞാലിമരയ്ക്കാറെന്നും മന്ത്രി കൂട്ടിച്ചേര്‍ത്തു.
കെ. ദാസന്‍ എം.എല്‍.എ അധ്യക്ഷനായി. പുരാവസ്തു വകുപ്പ് ഡയരക്ടര്‍ ജെ. റജികുമാര്‍ മന്ത്രിക്ക് ഉപഹാരം നല്‍കി. പൊതുമരാമത്ത് സ്റ്റാന്‍ഡിങ് കമ്മിറ്റി ചെയര്‍മാന്‍ കെ.വി ചന്ദ്രന്‍, വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സന്‍ ഉഷാ വളപ്പില്‍, ക്ഷേമകാര്യ സ്റ്റാന്‍ഡിങ് കമ്മിറ്റി ചെയര്‍മാന്‍ കൂടയില്‍ ശ്രീധരന്‍, വികസന സ്റ്റാന്‍ഡിങ് കമ്മിറ്റി ചെയര്‍പേഴ്‌സന്‍ സജിനി കോയിപറമ്പത്ത്, ആരോഗ്യ സ്റ്റാന്‍ഡിങ് കമ്മിറ്റി ചെയര്‍പേഴ്‌സന്‍ എം.വി സമീറ, ഡയരക്ടര്‍ ഇന്‍ ചാര്‍ജ് മ്യൂസിയം എസ്. അബു, വിവിധ രാഷ്ട്രീയപാര്‍ട്ടി പ്രതിനിധികള്‍ സംബന്ധിച്ചു.