താമരശേരി: 4,500 പാക്ക് നിരോധിത പുകയില ഉല്‍പന്നങ്ങളുമായി യുവാവ് പിടിയില്‍. എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ജിമ്മി ജോസഫും സംഘവും പൂനൂര്‍ 19-ല്‍ നടത്തിയ പരിശോധനയിലാണ് ചിറക്കല്‍ വീട്ടില്‍ കാസറക്കോടന്‍ ഷരീഫി (42) നെ രണ്ടുലക്ഷം രൂപയുടെ പുകയില ഉല്‍പന്നങ്ങളുമായി പിടികൂടിയത്. ചാക്കില്‍കെട്ടി സൂക്ഷിച്ച നിലയിലായിരുന്നു പുകയില ഉല്‍പന്നങ്ങള്‍.
പൂനൂര്‍ എകരൂല്‍ ഭാഗങ്ങളില്‍ മൊത്തമായും ചില്ലറയായും നിരോധിത പുകയില ഉല്‍പന്നങ്ങള്‍ വില്‍പന നടത്തിവരികയായിരുന്നു ഇയാള്‍. റെയ്ഡില്‍ പ്രിവന്റീവ് ഓഫിസര്‍ എം. അനില്‍കുമാര്‍, സിവില്‍ എക്‌സൈസ് ഓഫിസര്‍മാരായ സി.പി ഷാജു, ടി.കെ സഹദേവന്‍, കെ.പി രാജന്‍, ഇ.കെ സുരേന്ദ്രന്‍, പ്രസാദ് എന്നിവരും പങ്കെടുത്തു.