മാഹി: അടിപ്പാതയുടെ അഭാവംമൂലം കുഞ്ഞിപ്പള്ളിയില്‍ കഴിഞ്ഞദിവസം ഒരുജീവന്‍ കൂടി പൊലിഞ്ഞു. പാളം മുറിച്ചുകടക്കുന്നതിനിടയില്‍ പഴയ റെയില്‍വേ ഗെയിറ്റിനടുത്തു വച്ചാണ് അബദ്ധത്തില്‍ ട്രെയിന്‍ തട്ടിയത്. കല്ലാമലയിലെ വടക്കെ പൊന്നംകണ്ടി എടത്തട്ട ഭാസ്‌കരനാണു കഴിഞ്ഞദിവസം മരിച്ചത്. ഭാസ്‌കരനെ രക്ഷപ്പെടുത്താന്‍ ശ്രമിക്കുന്നതിടെ പരുക്കേറ്റ കരിയാട് നാരായണന്‍ ആശുപത്രിയില്‍ ചികിത്സയിലാണ്. റെയില്‍വേ മേല്‍പ്പാലം യാഥാര്‍ഥ്യമായതോടെ നേരത്തെയുള്ള ലെവല്‍ ക്രോസ് പാളംമുറിച്ച് കടക്കുന്നത് വന്‍ അപകടത്തിനു വഴിയൊരുക്കുന്നുമെന്ന് വിവിധ കോണുകളില്‍ നിന്ന് പരാതി ഉയര്‍ന്നിരുന്നു.
പല ട്രെയിനുകളും ഹോണ്‍ മുഴക്കാതെ പോകുന്നത് അപകടങ്ങള്‍ വര്‍ധിക്കാന്‍ സാധ്യതയുള്ളതായി നാട്ടുകാര്‍ പറയുന്നു. മേല്‍പ്പാലം കയറി പ്രായമായവര്‍ക്കും കുട്ടികള്‍ക്കും സഞ്ചരിക്കാന്‍ പറ്റാത്ത അവസ്ഥയാണ്. പാളംമുറിച്ച് കടക്കുമ്പോള്‍ വളവുള്ള ഭാഗത്ത് നിന്നു ട്രെയിന്‍ വരുന്നതറിയാതെ പലരും തലനാരിഴയ്ക്കാണ് രക്ഷപ്പെടുന്നത്. ഇവിടെ അടിപ്പാത സ്ഥാപിക്കാന്‍ നടപടിയെടുക്കണമെന്നു വിവിധ കോണുകളില്‍ നിന്ന് ആവശ്യം ഉയര്‍ന്നെങ്കിലും ഇക്കാര്യത്തില്‍ റെയില്‍വേയുടെ ഭാഗത്ത് നിന്നു നടപടികള്‍ ഇഴഞ്ഞുനീങ്ങുകയാണെന്നും പരാതി ഉയര്‍ന്നിട്ടുണ്ട്. കഴിഞ്ഞ ദിവസത്തെ അപകടത്തോടെ വിവിധ രാഷ്ട്രീയപാര്‍ട്ടികളും ജനപ്രതിനിധികളും അടിപ്പാത എന്ന ആവശ്യത്തിനായി ജനകീയ പോരാട്ടം ശക്തമാക്കുകയാണ്.