പഴയങ്ങാടി: പുതിയങ്ങാടി ചൂട്ടാട് എക്‌സൈസ് സംഘത്തിനു നേരെ ആക്രമണം. എക്‌സൈസ് കമ്മിഷണര്‍ ഋഷിരാജ് സിങ്ങിന്റെ നിര്‍ദേശപ്രകാരം ചൂട്ടാട് ബീച്ചിന് സമീപത്തെ കെ. റഫീഖ് താമസിക്കുന്ന വാടക ക്വാര്‍ട്ടേസില്‍ കഞ്ചാവ് പരിശോധനയ്ക്കായി തിരച്ചില്‍ നടത്തുന്നതിനിടെയാണു വനിതാ സിവില്‍ എക്‌സൈസ് ഓഫിസര്‍മാരായ എം.വി സുനന്ദ (36), വി.കെ ഷൈന (36) എന്നിവര്‍ക്കു നേരെ ആക്രമണം ഉണ്ടായത്.
വൈകിട്ട് ആറോടെയായിരുന്നു സംഭവം. കൈക്കും മുഖത്തും പരുക്കേറ്റ സിവില്‍ ഓഫിസര്‍മാരെ പഴയങ്ങാടി താലൂക്ക്് ആശുപത്രിയില്‍ പ്രവേശിപ്പിച്ചു. റഫീഖിന്റെ വാടക ക്വാര്‍ട്ടേഴ്‌സ് കേന്ദ്രീകരിച്ച് കഞ്ചാവ് വില്‍പന നടക്കുന്നുണ്ടെന്നു രഹസ്യ വിവരം ലഭിച്ചതിനെ തുടര്‍ന്നു പരിശോധനയ്‌ക്കെത്തിയ വനിതകള്‍ അടക്കമുള്ള എക്‌സൈസ് ഉദ്യോഗസ്ഥരെ സ്ത്രീകള്‍ അടക്കമുള്ളവര്‍ ചേര്‍ന്ന് മര്‍ദിക്കുകയാരുന്നുവെന്ന് പാപ്പിനിശ്ശേരി എക്‌സൈസ് റേഞ്ച് ഓഫിസര്‍ എ. ഹേമന്ത് കുമാര്‍ പറഞ്ഞു.
റഫീഖും വീട്ടുകാരും ചേര്‍ന്ന് പരിശോധന തടസപ്പെടുത്തിയതിനെ തുടര്‍ന്ന് എക്‌സൈസ് സംഘം അവിടെ നിന്ന് മടങ്ങുകയായിരുന്നു. പിന്നീടെത്തിയ തളിപ്പറമ്പ് സി.ഐ എം.എ മാത്യുവിന്റെ നേതൃത്വത്തിലുള്ള പൊലിസ് സംഘം കെ. റഫീഖ് (32), മുഹമ്മദ് ശരീഫ് (28), കെ. നിസാം (26) എന്നിവരെ അറസ്റ്റുചെയ്തു.