പുളിങ്ങോം/ഇരിട്ടി: കാനംവയലിലും ആറളം ഫാമിലും കാട്ടാനയിറങ്ങി കൃഷികള്‍ നശിപ്പിച്ചു. കാനംവയലില്‍ ഇടക്കോളനിയിലെ താഴെതുരുത്തില്‍ തോമസ്, ജോസ് എന്നിവരുടെയും പൂഴിക്ക നട ജോസിന്റെയും കൃഷിയിടത്തിലാണ് വ്യാഴാഴ്ച രാത്രി കാട്ടാനകള്‍ നാശം വിതച്ചത്. കര്‍ണാടക വനത്തില്‍നിന്ന് വൈദ്യുതി വേലി പൊളിച്ച് കൂട്ടത്തോടെ കൃഷിയിടത്തിലിറങ്ങിയ കാട്ടാനകള്‍ തെങ്ങുകളും കമുകുകളും പിഴുതെറിഞ്ഞ് കാമ്പ് തിന്നു. വാഴകള്‍, റബര്‍, കുരുമുളക് വള്ളികള്‍ കൈതകള്‍ എന്നിവയും നശിപ്പിച്ചിട്ടുണ്ട്. നിരവധി തെങ്ങുകളുടെ തൊലിയും ഇവ കുത്തിക്കളഞ്ഞിട്ടുണ്ട്.
ആറളം ഫാമില്‍ കാട്ടാനയിറങ്ങി വ്യാപകമായി കൃഷി നശിപ്പിച്ചു. ബ്ലോക്ക് ഒന്നില്‍ ഇരുപതോളം കായ്ഫലമുള്ള തെങ്ങുകള്‍ നശിപ്പിച്ചു. ഫാം സെക്യൂരിറ്റി ഓഫിസറുടെ നേതൃത്വത്തില്‍ സെക്യൂരിറ്റി ജീവനക്കാര്‍ ഉള്ളതിനാല്‍ ആളപായം ഉണ്ടായില്ല. ആദിവാസി പുനരധിവാസ മേഖലയിലെ ജനവാസ കേന്ദ്രങ്ങളിലുള്‍പ്പെടെ വിളയാടുമ്പോഴും കാട്ടാനയാക്രമണത്തെ പ്രതിരോധിക്കുന്നതിന് വനപാലകര്‍ മുന്നോട്ടു വരുന്നില്ലെന്ന പരാതി ഉയര്‍ന്നിട്ടുണ്ട്. കഴിഞ്ഞ മൂന്ന് മാസത്തിനുള്ളില്‍ ഫാം കൃഷിതോട്ടങ്ങളില്‍ എത്തിയ കാട്ടാനകള്‍ നൂറോളം തെങ്ങുകളും ഫലവൃക്ഷ തൈകളും വ്യാപകമായി നശിപ്പിച്ചിരുന്നു.