കല്‍പ്പറ്റ: ഇന്നവേറ്റീവ് കാംപസ് തിരഞ്ഞെടുത്ത ഇന്ത്യയിലെ മികച്ച 10 കോളജുകളില്‍ ഇടംനേടി താളൂരിലെ നീലഗിരി കോളജ് ഓഫ് ആര്‍ട്‌സ് ആന്‍ഡ് സയന്‍സ്. ഹയര്‍ എജ്യുക്കേഷന്‍ റിവ്യൂ മാഗസിനു വേണ്ടി വിദ്യാഭ്യാസ വിദഗ്ധരും വ്യാവസായിക പ്രമുഖരും യൂനിവേഴ്‌സിറ്റി പ്രതിനിധികളും ഉള്‍പ്പെട്ട പാനലാണ് മികച്ച കോളജുകളെ തിരഞ്ഞെടുത്തത്.
യു.ജി.സി അംഗീകാരമുള്ള കോളജില്‍ പ്രവര്‍ത്തിക്കുന്ന ഹാപ്പിനസ് സെന്റര്‍, തൊഴില്‍ വൈദഗ്ധ്യം ഉറപ്പുവരുത്തുന്ന സ്‌കില്‍ ബാങ്ക്, അമേരിക്കയിലെ മസാച്യൂസെറ്റ്‌സ് ഇന്‍സ്റ്റിറ്റ്യൂട്ട് ഓഫ് ടെക്‌നോളജി മാതൃകയിലുള്ള അണ്ടര്‍ ഗ്രാജ്വേറ്റ് സ്റ്റുഡന്റ്‌സ് ഗവണ്‍മെന്റ്, കോളജ് പ്ലേസ്‌മെന്റ് സെല്‍, ഇന്‍ഫോസിസ്, മലേഷ്യയിലെ മള്‍ട്ടിമീഡിയ യൂനിവേഴ്‌സിറ്റി എന്നിവിടങ്ങളില്‍ പരിശീലനം നേടുന്നതിനുള്ള അവസരം, മലേഷ്യന്‍ മള്‍ട്ടിമീഡിയ യൂനിവേഴ്‌സിറ്റിയുമായുള്ള ഫാക്കല്‍റ്റി എക്‌സ്‌ചേഞ്ച് പ്രോഗ്രാം, സിവില്‍ സര്‍വിസ് ഫൗണ്ടേഷന്‍ ബാച്ച് എന്നിവയാണു കോളജിനു മുതല്‍ക്കൂട്ടായതെന്ന് ഹയര്‍ എജ്യുക്കേഷന്‍ റിവ്യൂ വിലയിരുത്തുന്നു. മികച്ച പത്തു കോളജുകളില്‍ ഒന്നാകാന്‍ കഴിഞ്ഞതിനു പിന്നില്‍ പ്രിന്‍സിപ്പല്‍ പ്രൊഫ. എം. ദുരൈ, കോളജ് ഡീന്‍ പ്രൊഫ. മോഹന്‍ബാബു തുടങ്ങിയ മുഴുവന്‍ അധ്യാപകരുടെയും വിദ്യാര്‍ഥികളുടെയും പ്രയത്‌നമാണെന്ന് മാനേജിങ് ഡയരക്ടര്‍ റാഷിദ് ഗസ്സാലി പറഞ്ഞു.
അബീര്‍ ഗ്രൂപ്പ് ചെയര്‍മാന്‍ ഡോ. ആലുങ്കല്‍ മുഹമ്മദാണ് കോളജ് ചെയര്‍മാന്‍. അണ്ണാ യൂനിവേഴ്‌സിറ്റി വൈസ് ചാന്‍സലറായിരുന്ന പ്രൊഫ. ബാലഗുരുസ്വാമി ചെയര്‍മാനായ കോളജ് അഡൈ്വസറി ബോര്‍ഡില്‍ കാലിക്കറ്റ് യൂനിവേഴ്‌സിറ്റി മുന്‍ വൈസ് ചാന്‍സലര്‍ ഡോ. കെ.കെ.എന്‍ കുറുപ്പ്, കേരള സ്റ്റാര്‍ട്ടപ്പ് മിഷന്‍ സി.ഇ.ഒ ഡോ. സജി ഗോപിനാഥ്, കാലിക്കറ്റ് യൂനിവേഴ്‌സിറ്റി മുന്‍ രജിസ്ട്രാര്‍ ഡോ. എം. ദാസന്‍ എന്നിവര്‍ അംഗങ്ങളാണ്.