വാഷിങ്ടണ്‍: ഉ.കൊറിയന്‍ ഭീഷണി ശക്തമായിരിക്കെ യു.എസ് വ്യോമസേന ബാലിസ്റ്റിക് മിസൈല്‍ പരീക്ഷിച്ചു. ഇന്നലെ കാലിഫോര്‍ണിയയിലെ സൈനിക താവളത്തിലാണ് പേരു വെളിപ്പെടുത്താത്ത മിസൈല്‍ പരീക്ഷിച്ചത്. ഇതിന്റെ ദൃശ്യങ്ങള്‍ യു.എസ് എയര്‍ഫോഴ്‌സ് പുറത്തുവിട്ടു. മിസൈലിന്റെ കാര്യക്ഷമതയും കൃത്യതയും പരീക്ഷിക്കാനാണ് വിക്ഷേപണമെന്ന് എയര്‍ഫോഴ്‌സ് പറഞ്ഞു.
ആണവായുധം വഹിക്കാന്‍ ശേഷിയുള്ളതാണ് മിസൈലെന്ന് സൈന്യം പറഞ്ഞു.
5,500 കി.മി ദൂരം സഞ്ചരിക്കാന്‍ ശേഷിയുള്ള മിസൈലിന്റെ പരമാവധി വേഗപരിധി 14,500 എം.പി.എച്ചാണ്. അതിനിടെ, ദ.കൊറിയയില്‍ യു.എസ് മിസൈല്‍ പ്രതിരോധ കവചം ഒരുക്കുന്നതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു.
സിയൂള്‍ ഉള്‍പ്പെടുന്ന പ്രദേശത്തെ മിസൈല്‍ ആക്രമണത്തില്‍ നിന്ന് ചെറുക്കാനാണ് താഡ് പ്രതിരോധ സംവിധാനം ഏര്‍പ്പെടുത്തുന്നത്.