മാനന്തവാടി: എടവക പനമരം പഞ്ചായത്തുകളെ തമ്മില്‍ ബന്ധിപ്പിക്കുന്ന ഉള്ളിശ്ശേരി-പുലിക്കാട് റോഡ് ഗതാഗതയോഗ്യമാക്കണമെന്ന പ്രദേശവാസികളുടെ ആവശ്യം അധികൃതര്‍ അവഗണിക്കുന്നു. 1999ല്‍ സോളിങ് നടത്തിയതല്ലാതെ പിന്നീട് ഇതുവരെയായി യാതൊരുവിധ പ്രവൃത്തികളും നടത്താത്തതിനാല്‍ തന്നെ റോഡ് പൂര്‍ണമായും തകര്‍ന്ന് കിടക്കുകയാണ്.
ഓട്ടോറിക്ഷകള്‍ പോലും സര്‍വിസ് നടത്താന്‍ മടിക്കുന്നത് പ്രദേശത്തെ നൂറുകണക്കിന് കുടുംബങ്ങളെയാണ് ദുരിതത്തിലാക്കിയിരിക്കുന്നത്.
ദ്വാരക ഹയര്‍ സെക്കന്‍ഡറി സ്‌കൂളിലേക്ക് ആറാം മൈല്‍, കമ്മന, കുണ്ടാല എന്നിവിടങ്ങളില്‍ നിന്നുള്ള നിരവധി വിദ്യാര്‍ഥികളുടെ ആശ്രയമായ റോഡ് കൂടിയാണിത്. റോഡ് ഗതാഗതയോഗ്യമാക്കണമെന്ന് നിരവധി തവണ ആവശ്യപ്പെട്ടിട്ടും അധികൃതരുടെ ഭാഗത്ത് നിന്ന് യാതൊരു നടപടിയും ഉണ്ടായില്ലെന്ന് നാട്ടുകാര്‍ ആരോപിച്ചു. മഴക്കാലത്ത് ഇതിലൂടെ കാല്‍ നടയാത്ര പോലും ദുഷ്‌ക്കരമായി മാറും.
അതേസമയം എടവക പഞ്ചായത്തില്‍ ഉള്‍പ്പെട്ടഭാഗം പൂര്‍ണമായും ടാറിങ് പൂര്‍ത്തീകരിച്ചതുമാണ്. ആറാം മൈലില്‍ നിന്ന് മാനന്തവാടിയിലേക്കുള്ള എളുപ്പമാര്‍ഗം കൂടിയാണിത്.
വെറും 500 മീറ്റര്‍ മാത്രം ടാറിങ് നടത്തിയാല്‍ റോഡ് ഗതാഗതയോഗ്യമാക്കാന്‍ കഴിയും എന്നാല്‍ ഇക്കാര്യത്തില്‍ അധികൃതരുടെ ഭാഗത്ത് നിന്ന് തികഞ്ഞ അനാസ്ഥയാണ് ഉണ്ടാകുന്നതെന്ന് നാട്ടുകാര്‍ ആരോപിച്ചു.