കല്‍പ്പറ്റ: എരുമാട് ഹയാത്തുല്‍ ഇസ്‌ലാം മഹല്ല് കമ്മിറ്റിയുടെ രണ്ടാമത് വിവാഹ സംഗമം 'മംഗല്യ-17' ഈമാസം 30ന് നടക്കുമെന്ന് സംഘാടക സമിതി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.
മഹല്ല് കമ്മിറ്റിയുടെ രണ്ടാമത് വിവാഹ സംഗമത്തിലൂടെ ഇത്തവണ 12 യുവതികളാണ് സുമംഗലികളാവുന്നത്. 30ന് രാവിലെ 11.30ന് നടക്കുന്ന സംഗമം കേരളാ വഖഫ് ബോര്‍ഡ് ചെയര്‍മാന്‍ പാണക്കാട് റഷീദലി ശിഹാബ് തങ്ങള്‍ ഉദ്ഘാടനം ചെയ്യും. കോഴിക്കോട് വലിയ ഖാസി പാണക്കാട് നാസര്‍ ഹയ്യ് ശിഹാബ് തങ്ങള്‍, മുബഷിറലി ശിഹാബ് തങ്ങള്‍, ഒ.കെ ഇമ്പിച്ചികോയ തങ്ങള്‍ ഗൂഡല്ലൂര്‍, അലി അക്ബര്‍ തങ്ങള്‍ എടരിക്കോട്, ഒ.കെ.എസ് തങ്ങള്‍ പാടന്തറ എന്നിവര്‍ നിക്കാഹിന് കാര്‍മികത്വം വഹിക്കും. തമിഴ്‌നാട് തൊഴില്‍ വകുപ്പ് മന്ത്രി ഡോ. നിലൂഫര്‍ കഫീല്‍ മുഖ്യാതിഥിയാകും. എരുമാട് ജുമാമസ്ജിദ് ഖത്തീബ് റാഷിദ് ഗസ്സാലി കൂളിവയല്‍ സന്ദേശം നല്‍കും. കെ.ആര്‍ അര്‍ജുനന്‍ എം.പി, അഡ്വ. ദ്രാവിഡമണി എം.എല്‍.എ, ഡോ. പി.എ ഇബ്രാഹിം ഹാജി, ഫാ. ഷിബു കുറ്റിപ്പറിച്ചേല്‍, സ്വാമി ആനന്ദജ്യോതി ജ്ഞാനതപസ്വി, കമാല്‍ വരദൂര്‍, കെ.പി മുഹമ്മദ് ഹാജി, പി.കെ മുഹമ്മജ് ബാഖവി സംബന്ധിക്കും.
സംഗമത്തിന്റെ ഭാഗമായി ഇന്ന് വൈകിട്ട് ഏഴിന് ദുആ മജ്‌ലിസും, ഉലമാ-ഉമറാ സംഗമവും നടക്കും. അംജദ് ഫൈസി ഉദ്ഘാടനം ചെയ്യും. റാഷിദ് ഗസാലി ഉദ്‌ബോധനം നടത്തും. ഒ.കെ.എസ് പാടന്തറ നേതൃത്വം നല്‍കും. നാളെ നടക്കുന്ന ഖുര്‍ആന്‍ ആസ്വാദനരാവ് ശിഹാബുദ്ദീന്‍ ഇമ്പിച്ചികോയ തങ്ങള്‍ ഉദ്ഘാടനം ചെയ്യും.
അല്‍ഖാരിഅ് മുഹമ്മദ് അനീസുദ്ധീന്‍ ഭട്കല്‍, അല്‍ഹാഫിള് അസീസ് മൗലവി കണ്ണൂര്‍ നേതൃത്വം നല്‍കും. 29ന് നടക്കുന്ന ഇശല്‍-ഖവാലി രാവ് ഫൈസല്‍ എളേറ്റില്‍ ഉദ്ഘാടനം ചെയ്യും. എം.ബി ജമാല്‍ അധ്യക്ഷനാവും. ഇശല്‍ മേജര്‍ നിലമ്പൂര്‍, നസീം നാസര്‍ എരുമാട് നേതൃത്വം നല്‍കും. വാര്‍ത്താസമ്മേളനത്തില്‍ എരുമാട് ഇമാം അംജദ് ഫൈസി, മഹല്ല് സെക്രട്ടറി എന്‍.ആര്‍ അബ്ദല്‍മജീദ്, വൈസ്പ്രസിഡന്റ് റഷീദ് ഹാജി, സെക്രട്ടറി കെ.ഇ.എച്ച് നൗഷാദ് പങ്കെടുത്തു.