തിരുവനന്തപുരം: മത്തിക്കച്ചവടം പോലെയല്ല ബോണ്ട് വാങ്ങുന്നതെന്ന് പറഞ്ഞ ധനമന്ത്രി തോമസ് ഐസക്ക് മത്സ്യത്തൊഴിലാളികളെ അപമാനിച്ചുവെന്ന് പ്രതിപക്ഷ നേതാവ് രമേശ് ചെന്നിത്തല.

മത്സ്യത്തൊഴിലാളികള്‍ മാന്യമായി തൊഴില്‍ ചെയ്ത് ജീവിക്കുന്നവരാണ്. മത്തിക്കച്ചവടം മാന്യമായ തൊഴിലാണ്. ബോണ്ട് വിറ്റ് കമ്മിഷന്‍ അടിക്കുന്നതാണ് അധമമായ ജോലി. ആലപ്പുഴയില്‍ മത്സ്യത്തൊഴിലാളികളുടെ വോട്ട് വാങ്ങി ജയിച്ച തോമസ് ഐസക്ക് മത്സ്യത്തൊഴിലാളികളെ അപമാനിച്ചിരിക്കുകയാണ്. ഇതിന് അദ്ദേഹം മത്സ്യത്തൊഴിലാളികളോട് മാപ്പുപറയണം.

മസാല ബോണ്ട് കേരളത്തെ പണയപ്പെടുത്തുന്നതും ഭാവിതലമുറയെ കടക്കെണിയിലാക്കുന്നതുമാണ്.
ട്രഷറി പൂട്ടിയിടുകയും നാടിന്റെ സാമ്പത്തികനില തകര്‍ക്കുകയും ചെയ്ത ധനമന്ത്രി നാടിന് ബാധ്യതയായി മാറിയെന്നും ചെന്നിത്തല പറഞ്ഞു.