കണ്ണൂര്‍: പട്ടികജാതി വികസന വകുപ്പിന്റെ അധീനതയിലുള്ള മോഡല്‍ റസിഡന്‍ഷ്യല്‍ സ്‌കൂളുകളോ ഹോസ്റ്റലുകളോ കൊവിഡ് ഫസ്റ്റ് ലൈന്‍ ചികിത്സാ സെന്ററാക്കുന്നതിന് വിട്ടു നല്‍കില്ലെന്ന് വകുപ്പ് സെക്രട്ടറിയുടെ വിചിത്ര ഉത്തരവ്. സ്‌കൂളുകളോ ഹോസ്റ്റലുകളോ വിട്ടു നല്‍കരുതെന്നും സാധനസാമഗ്രികള്‍ കൈമാറ്റം ചെയ്യപ്പെടാനും പാടില്ലെന്നുമാണ് വിവാദ ഉത്തരവില്‍ വ്യക്തമാക്കുന്നത്. ജില്ലാ ദുരന്തനിവാരണ അതോറിറ്റി ചെയര്‍മാനെന്ന നിലയില്‍ അടിയന്തര സാഹചര്യത്തില്‍ കലക്ടര്‍മാര്‍ക്കു ഏതു കെട്ടിടവും ഏറ്റെടുക്കാനുള്ള അധികാരം നിലനില്‍ക്കെയാണു സര്‍ക്കാരിന്റെ ഉടമസ്ഥതയിലുള്ള കെട്ടിടങ്ങള്‍ ഏറ്റെടുക്കരുതെന്നു പട്ടികജാതി, പട്ടിക വര്‍ഗവകുപ്പ് പ്രിന്‍സിപ്പല്‍ സെക്രട്ടറി പുനീത് കുമാര്‍ വിചിത്രമായ ഉത്തരവിറക്കിയത്.

അടിയന്തര ദുരന്ത സാഹചര്യങ്ങളില്‍ അപ്പാര്‍ട്ട്‌മെന്റ് സമുച്ചയം ഉള്‍പ്പെടെ ഏതു കെട്ടിടവും ഏറ്റെടുക്കാന്‍ ദുരന്തം കൈകാര്യം ചെയ്യുന്ന അതോറിറ്റിക്കു അധികാരമുണ്ടെന്ന് ഹൈക്കോടതി ഉത്തരവിറക്കിയ ബുധനാഴ്ചയാണു പട്ടികജാതി, പട്ടിക വര്‍ഗവകുപ്പ് സെക്രട്ടറിയുടെ വിരുദ്ധ ഉത്തരവ്.

വകുപ്പിനു കീഴിലുള്ള സ്‌കൂളുകളിലെയും ഹോസ്റ്റലുകളിലെയും ഫര്‍ണിച്ചറുകള്‍ കൊണ്ടുപോകാന്‍ പാടില്ലെന്നും ഉത്തരവില്‍ വ്യക്തമാക്കി. കൊവിഡുമായി ബന്ധപ്പെട്ട പ്രവര്‍ത്തനങ്ങള്‍ക്കു തദ്ദേശ സ്ഥാപനങ്ങള്‍ക്കു സര്‍ക്കാര്‍ മതിയായ ഫണ്ട് നല്‍കിയിട്ടുണ്ട്. ഈ തുക ഉപയോഗിച്ച് താല്‍കാലികമായി കൊവിഡ് ഫസ്റ്റ്‌ലൈന്‍ ചികിത്സാ സെന്ററുകള്‍ സ്ഥാപിക്കുകയും അടിസ്ഥാന സൗകര്യം ഒരുക്കുകയും ചെയ്യണമെന്നാണു സര്‍ക്കാര്‍ തീരുമാനമെന്ന് ഉത്തരവില്‍ പറയുന്നു. എന്നാല്‍ മോഡല്‍ റസിഡന്‍ഷ്യല്‍ സ്‌കൂളുകളും ഹോസ്റ്റലുകളും ക്വാറന്റൈന്‍ സെന്ററായി ഉപയോഗിക്കാമെന്നും പട്ടികജാതി, പട്ടികവര്‍ഗ വികസന വകുപ്പുകളുടെ ഡയറക്ടര്‍മാര്‍ക്ക് സെക്രട്ടറി നല്‍കിയ നിര്‍ദേശത്തില്‍ വ്യക്തമാക്കി.