കൊല്‍ക്കത്ത: ഡല്‍ഹി കാപിറ്റല്‍സിന് മുന്‍പില്‍ വീണ്ടും മുട്ടുമടക്കി കൊല്‍ക്കത്ത നൈറ്റ്‌റൈഡേഴ്‌സ്. സീസണില്‍ ഡല്‍ഹിയുമായി നടന്ന ആദ്യ മത്സരത്തില്‍ സൂപ്പര്‍ ഓവറില്‍ കീഴടങ്ങിയ കൊല്‍ക്കത്ത ഇന്നലെ ഏഴുവിക്കറ്റിനാണ് ഡല്‍ഹിയോട് പരാജയപ്പെട്ടത്. കൊല്‍ക്കത്ത ഉയര്‍ത്തിയ 178 റണ്‍സെന്ന ഭേദപ്പെട്ട വിജയലക്ഷ്യം ഏഴ് പന്തുകള്‍ ബാക്കിനിര്‍ത്തി ഡല്‍ഹി മറികടന്നു. ശിഖര്‍ ധവാന്റെയും പുറത്താവാതെ (63 പന്തില്‍ 97) ഋഷഭ് പന്തിന്റെയും (31 പന്തില്‍ 46) ബാറ്റിങ് പ്രകടനമാണ് ഡല്‍ഹിയെ വിജയത്തിലെത്തിച്ചത്. ഡല്‍ഹിക്കായി പൃഥി ഷാ (14), കോളിന്‍ ഇന്‍ഗ്രാം (14*), ശ്രേയസ് അയര്‍ (6) എന്നിവരും റണ്‍സെടുത്തു. ടോസ് നേടിയ ഡല്‍ഹി കൊല്‍ക്കത്തയെ ബാറ്റിങിനയക്കുകയായിരുന്നു.

ഇന്നിങ്‌സിന്റെ ആദ്യ പന്തില്‍ത്തന്നെ ഓപ്പണര്‍ ഡെന്‍ലിയെ കൊല്‍ക്കത്തയ്ക്ക് നഷ്ടമായി. ഇഷാന്ത് ശര്‍മയുടെ പന്തില്‍ ഡെന്‍ലി ക്ലീന്‍ ബൗള്‍ഡാവുകയായിരുന്നു. എന്നാല്‍ രണ്ടാം വിക്കറ്റില്‍ ഒത്തുചേര്‍ന്ന ശുഭ്മാന്‍ ഗില്ലും ഉത്തപ്പയും കൊല്‍ക്കത്തന്‍ സ്‌കോര്‍ മുന്നോട്ടു കൊണ്ടുപോയി. ഒരു ഭാഗത്ത് വിക്കറ്റ് കളയാതെ ഉത്തപ്പ സ്‌കോര്‍ പതുക്കെ ചലിപ്പിച്ചപ്പോള്‍ മറുഭാഗത്ത് ഗില്ല് ആഞ്ഞടിച്ചു. ഏഴു ബൗണ്ടറിയും രണ്ടു സിക്‌സറുമടക്കം 39 പന്തില്‍ 65 റണ്‍സെടുത്ത ഗില്ലിനെ കീമോ പോളിന്റെ പന്തില്‍ അക്‌സര്‍ പട്ടേല്‍ പിടിച്ചു പുറത്താക്കുകയായിരുന്നു. അവസാന ഓവറുകളില്‍ പതിവു ശൈലിയില്‍ റസ്സല്‍ (21 പന്തില്‍45 റണ്‍സ്) അടിച്ചു തകര്‍ത്തതോടെ കൊല്‍ക്കത്തന്‍ സ്‌കോര്‍ ഏഴു വിക്കറ്റിന് 178 ലെത്തി. ഡല്‍ഹിക്കു വേണ്ടി റബാദയും മോറിസും കീമോ പോളും രണ്ടു വിക്കറ്റ് വീതവും ഇഷാന്ത് ശര്‍മ ഒരു വിക്കറ്റും നേടി.