തിരുവനന്തപുരം: സി.പി.എമ്മിന് കണ്‍സള്‍ട്ടന്‍സി വേണ്ടെന്ന നിലപാടില്ലെന്ന് സംസ്ഥാന സെക്രട്ടറി കോടിയേരി ബാലകൃഷ്ണന്‍. എല്ലാ സര്‍ക്കാരും കണ്‍സള്‍ട്ടന്‍സി നിയമനങ്ങള്‍ നടത്തുന്നുണ്ടെന്നും കണ്‍സള്‍ട്ടന്‍സി ഒഴിവാക്കാന്‍ പാര്‍ട്ടി നിര്‍ദേശം നല്‍കിയിട്ടില്ലെന്നും അദ്ദേഹം വ്യക്തമാക്കി. 

മന്ത്രിമാരുടെ പേഴ്‌സണല്‍ സ്റ്റാഫിന്റെ യോഗത്തില്‍ തെറ്റില്ലെന്നും കോടിയേരി വിശദീകരിച്ചു. മന്ത്രിമാരുടെ സ്റ്റാഫിലെ സി.പി.എം അംഗങ്ങളുടെ യോഗമാണ് വിളിച്ചത്. ആറുമാസം കൂടുമ്പോള്‍ ഇത്തരം യോഗങ്ങള്‍ വിളിക്കാറുണ്ടെന്നും കോടിയേരി പറഞ്ഞു. 

എം.ശിവശങ്കറിനെതിരായ ആരോപണം പാര്‍ട്ടിയെയും സര്‍ക്കാരിനെയും ബാധിക്കില്ല. 

എന്‍.ഐ.എ ശിവശങ്കറിനെതിരേ എടുക്കുന്ന എന്തുനടപടിയും വ്യക്തിയെ മാത്രമേ ബാധിക്കൂ. ഉമ്മന്‍ ചാണ്ടിയെ മുന്‍പ് ചോദ്യം ചെയ്തത് ആരും മറന്നുപോകരുതെന്നും എന്‍.ഐ.എയ്ക്ക് എവിടെ വേണമെങ്കിലും അന്വേഷിക്കാമെന്നും ആരും തടസപ്പെടുത്തില്ലെന്നും അദ്ദേഹം പറഞ്ഞു.