കോട്ടയം: 'ചെമ്പൈ: മൈ ഡിസ്‌കവറി ഓഫ് ലെജന്റ്' ഡോക്യുമെന്ററിക്ക് ദേശീയ അവാര്‍ഡ് ലഭിച്ചത് അപ്രതീക്ഷതമായിരുന്നുവെന്ന് സംവിധായിക സൗമ്യ സദാനന്ദന്‍. കോട്ടയം പ്രസ് ക്ലബിന്റെ മീറ്റ് ദ പ്രസ് പരിപാടിയില്‍ പങ്കെടുത്ത് സംസാരിക്കുകയായിരുന്നു അവര്‍. 36 മിനിറ്റ് 11 സെക്കന്റ് ദൈര്‍ഘ്യമുള്ള ട്രാവല്‍ ആന്‍ഡ് മ്യൂസിക് ഡോക്യൂമെന്ററിയാണിതെന്ന് സൗമ്യ പറഞ്ഞു. പാലക്കാട്ടെ ചെമ്പൈയില്‍ ഗായകന്‍ കെ.ജെ യേശുദാസിന്റെ സംഗീതക്കച്ചേരി കേള്‍ക്കാന്‍ പോയതാണ് ഇത്തരത്തിലൊരു ഡോക്യുമെന്ററി ചിത്രീകരിക്കാന്‍ ഇടയായതെന്ന് സംവിധായിക വ്യക്തമാക്കി. ചെമ്പൈ സംഗീതോത്സവത്തിന്റെ 100ാം വാര്‍ഷികം കാണുവാന്‍ എത്തിയപ്പോള്‍ അത് ആരും ചിത്രീകരിക്കുന്നത് കണ്ടില്ല. താന്‍ മാത്രമായിരുന്നു സംഗീതോത്സവംചിത്രീകരിക്കാനായി അവിടെ ഉണ്ടായിരുന്നതെന്നും സൗമ്യ പറഞ്ഞു.