ശാസ്താംകോട്ട: ഉത്സവ സ്ഥലത്തെ സംഘര്‍ഷത്തെ തുടര്‍ന്ന് വീട് കയറി അക്രമം നടത്തുകയും മൂന്ന് പേരെ വെട്ടിപ്പരുക്കേല്‍പ്പിക്കുകയും ചെയ്ത സംഭവത്തിലെ പ്രതികളെ അറസ്റ്റ് ചെയ്തു.  മുതുപിലാക്കാട് വടക്കേ നെടിയത്ത് അമല്‍ കാര്‍ത്തികേയന്‍ (21), രൂപേഷ് നിവാസില്‍ രൂപേഷ് (26), കലവറ വീട്ടില്‍ ശ്രീക്കുട്ടന്‍ (26) എന്നിവരെയാണ് ശാസ്താംകോട്ട പൊലിസ് അറസ്റ്റ് ചെയ്തത്. മുതുപിലാക്ക് ക്ഷേത്രത്തിലെ ഉത്സവത്തോടനുബന്ധിച്ച് നടന്ന സംഘര്‍ഷത്തെ തുടര്‍ന്നാണ് മുതുപിലാക്കാട് കിഴക്ക് വടക്കേ മുല്ലശ്ശേരില്‍ സരോജനി അമ്മയുടെ വീട്ടില്‍ അക്രമം നടത്തിയത്.  മക്കളായ അജയകുമാര്‍ (36), ജയകുമാര്‍ (30) എന്നിവര്‍ക്കും ഇവരുടെ ബന്ധുവും സമീപവാസിയുമായ സൈനികന്‍ ശരത് (30) എന്നിവര്‍ക്ക് ഗുരുതരമായ പരുക്കേല്‍ക്കുകയും ചെയ്തിരുന്നു. അജയകുമാറും ജയകുമാറും ശാസ്താംകോട്ട താലൂക്ക് ആശുപത്രിയിലും ശരത് തിരുവനന്തപുരം മെഡിക്കല്‍ കോളേജിലും ചികിത്സയിലാണ്.  പ്രതികള്‍ക്കെതിരേ വധശ്രമം ഉള്‍പ്പെടെയുള്ള വകുപ്പുകള്‍ ചാര്‍ത്തിയാണ് കേസെടുത്തിരിക്കുന്നത്. പ്രതികളെ റിമാന്‍ഡ് ചെയ്തു.