റിയാദ്: സഊദിയിൽ രണ്ടു മലയാളികളെ ആത്മഹത്യ ചെയ്‌ത നിലയിൽ കണ്ടെത്തി. ഹഫർ അൽ ബാത്വിനിൽ കൊല്ലം സ്വദേശിയെയുയും തലസ്ഥാന നഗരിയായ റിയാദിൽ പാലക്കാട് സ്വദേശിയേയുമാണ് ആത്മഹത്യ ചെയ്‌ത നിലയിൽ കണ്ടെത്തിയത്. കൊല്ലം തേവലക്കര സ്വദേശി ഗോപാല കൃഷ്ണന്‍ (55) ആണ് ഹഫർഅൽബാത്വിനിൽ താമസ സ്ഥലത്ത് ആത്മഹത്യ ചെയ്‌തത്‌. കഴിഞ്ഞ കുറച്ച് ദിവസങ്ങളായി ഇദേഹത്തിന് പനിയുണ്ടായിരുന്നു. കൊവിഡാണെന്ന ഭയം കാരണം ഇദ്ദേഹം മാനസിക വിഷമത്തിലായിരുന്നുവെന്ന് സുഹൃത്തുക്കൾ പറഞ്ഞു.

     കഴിഞ്ഞ ദിവസം രാവിലെ സുഹൃത്തിനെ പ്രഭാത ഭക്ഷണം വാങ്ങാന്‍ അയക്കുകയും സുഹ്യത്ത് തിരികെ വന്നപ്പോള്‍ ഗോപാല ക്യഷ്ണനെ തൂങ്ങിമരിച്ച നിലയില്‍ കാണുകയുമായിരുന്നു. പ്രാഥമിക നടപടികള്‍ സ്വീകരിച്ച് മൃതദേഹം കിംഗ് ഖാലിദ് ഹോസ്പിറ്റല്‍ മോര്‍ച്ചറിയില്‍ സൂക്ഷിച്ചിരിക്കുകയാണ്. 30 വര്‍ഷമായി ഇദ്ദേഹം കുടിവെള്ള ടാങ്കര്‍ ഡ്രൈവറായി ജോലി ചെയ്യുകയാണ്. ഭാര്യ: സീമ. മക്കള്‍: ആദിത്യന്‍, അര്‍ച്ചന. ഇന്ത്യന്‍ സോഷ്യല്‍ ഫോറം വളന്റിയര്‍മാരായ ഷിനുഖാന്‍ പന്തളം, നൗഷാദ് കൊല്ലം, നൗഫല്‍ എരുമേലി തുടങ്ങിയവര്‍ തുടര്‍നടപടികളുമായി രംഗത്തുണ്ട്.

      പാലക്കാട് പുതുനഗരം കാട്ടുതെരുവ് സ്വദേശി വിനുകുമാര്‍ (32) ആണ് റിയാദില്‍ ആത്മഹത്യ ചെയ്തത്. എക്‌സിറ്റ് എട്ടിലെ റൂമിലാണ് ഇദ്ദേഹത്തെ മരിച്ച നിലയില്‍ കണ്ടെത്തിയത്. രണ്ട് ദിവസം മുമ്പ് മരിച്ചതായി സംശയമുണ്ട്. മണിയന്‍- കല്യാണി ദമ്പതികളുടെ മകനാണ്. അവിവാഹിതനാണ്. മൃതദേഹവുമായി ബന്ധപ്പെട്ട നടപടികൾക്ക്‌ റിയാദ് കെ.എം.സി.സി വെല്‍ഫയര്‍ വിംഗ് ചെയര്‍മാന്‍ സിദ്ദീഖ് തുവ്വൂരിന്റെ നേതൃത്വത്തില്‍ പ്രവര്‍ത്തകര്‍ രംഗത്തുണ്ട്.