പേര്യ: കഴിഞ്ഞ ദിവസം മുതല്‍ കാണാതായ പേര്യ 38ലെ തയ്യുള്ളതില്‍ അയ്യൂബിന്റെ മകന്‍ അജ്മലിനായി മനമുരുകി പ്രാര്‍ഥിച്ച് നാട്.
രണ്ടാം ദിവസവും കണ്ടെത്താനായില്ല. സംഭവത്തില്‍ ജില്ലാ ഭരണകൂടം നാവികസേനയുടെയും ദുരന്തനിവാരണ സേനയുടെയും സഹായം തേടി.വെള്ളിയാഴ്ച്ച ഉച്ച മുതലാണ് പള്ളിയില്‍ പോയി തിരിച്ചുവരുന്ന വഴിയിലാണ് അജ്മലിനെ കാണാതായത്. ഇതിനെ തുടര്‍ന്ന് അഗ്നിശമന സേനയും നാട്ടുകാരും തിരച്ചില്‍ നടത്തുകയായിരുന്നു. പ്രതികൂല കാലവസ്ഥ കാരണം വെള്ളി വൈകിട്ട് നിര്‍ത്തിവെച്ച തെരച്ചില്‍ ശനി രാവിലെ മുതല്‍ വൈകീട്ട് വരെയും തുടര്‍ന്നു. കനത്ത കുത്തൊഴുക്കുള്ളതിനാല്‍ തോട്ടില്‍ പരിശോധന സങ്കീര്‍ണമായതിനെ തുടര്‍ന്നാണ് നാവിക സേനയുടെയും ദേശീയ ദുരന്ത നിവാരണ സേനയുടെയും സഹായം തേടിയത്. എ.ഡി.എം കെ.എം രാജു, ഡെപ്യൂട്ടി കലക്ടര്‍മാരായ ഇ.പി മേഴ്‌സി, കെ. ജയപ്രകാശ്, തഹസില്‍ദാര്‍ എന്‍.ഐ ഷാജു എന്നിവരുടെ നേതൃത്ത്വത്തിലുള്ള സംഘം സ്ഥലത്ത് ക്യാംപ് ചെയ്ത് സ്ഥിതിഗതികള്‍ വിലയിരുത്തുന്നുണ്ട്. മഴയ്ക്ക് നേരിയ ശമനമുണ്ടെങ്കിലും വെള്ളം ഇറങ്ങാത്തത് രക്ഷാപ്രവര്‍ത്തനങ്ങള്‍ക്ക് തടസമാകുകയാണ്.