പുനലൂര്‍: അനധികൃതമായി മണ്ണു കയറ്റിയ ടിപ്പര്‍ ലോറികള്‍ പൊലിസ് കസ്റ്റഡിയിലെടുത്തു. ഇന്നലെ ഉച്ചയോടെയാണ് മണ്ണെടുപ്പു നിരോധിച്ച പുനലൂര്‍ എം.എല്‍.എ റോഡിനു സമീപമുള്ള വസ്തുവില്‍ നിന്നും നിയമവിരുദ്ധമായി മണ്ണു കയറ്റിയ രണ്ടു ടിപ്പര്‍ ലോറികള്‍ പുനലൂര്‍ പൊലിസ് കസ്റ്റഡിയില്‍ എടുത്തത്.
മൂന്നു മാസങ്ങള്‍ക്കു മുമ്പ് ഇവിടെ കുന്നിടിച്ച് വയല്‍ നികത്തിയതിനെതിരേ സന്നദ്ധ സംഘടനകള്‍ സമരം ചെയ്തിരുന്നു. ഇതേതുടര്‍ന്ന് റവന്യൂ വകുപ്പ് മണ്ണെടുപ്പു നിരോധിച്ചുള്ള പരസ്യം പതിച്ച സ്ഥലത്തു നിന്നുമാണ് പൊലിസ് അധികൃതര്‍ വണ്ടികള്‍ പിടിച്ചെടുത്തത്. പുനലൂര്‍ പൊലിസ് അഡീഷനല്‍ എസ്.ഐ ഷെരീഫിന്റെ നേതൃത്വത്തിലുള്ള പൊലിസ് സംഘമാണ് വാഹനങ്ങള്‍ പിടിച്ചെടുത്തത്.
ഈ റോഡിനു സമീപം ഭൂമാഫിയ അനവധി വയലുകളും കുന്നുകളും വാങ്ങിക്കൂട്ടി മണ്ണ് കച്ചവടവും ഭൂമി വില്‍പനയും തകൃതിയായി നടത്തുന്നതിനെതിരേ നിരവധി സന്നദ്ധ സംഘടനകള്‍ പ്രത്യക്ഷ സമരത്തിലാണ്.
പുനലൂരില്‍ കിഫ്ബി ഫണ്ടില്‍ നിന്നും 200 കോടിയോളം രൂപയുടെ നിര്‍മാണ പ്രവര്‍ത്തനങ്ങള്‍ ഏറ്റെടുത്തിട്ടുള്ള കരാറുകാരുടെ നിയന്ത്രണത്തിലാണ് ഇവിടുത്തെ ഇത്തരം പ്രവൃത്തികള്‍ നടക്കുന്നതെന്ന് ആരോപിച്ചും കുന്നിടിച്ചിലും വയല്‍ നികത്തലും അവസാനിപ്പിക്കണമെന്ന് ആവശ്യപ്പെട്ട് ജനകീയ മുന്നേറ്റ സമിതിയുടെ ആഭിമുഖ്യത്തില്‍ പ്രക്ഷോഭം സംഘടിപ്പിക്കുമെന്ന് ഭാരവാഹികള്‍ അറിയിച്ചു.