കൊല്ലം: ഗ്രാമവികസന വകുപ്പിലെ ജീവനക്കാര്‍ക്ക് വിശിഷ്ട സേവനത്തിന് പുരസ്‌കാരങ്ങള്‍ വിതരണം ചെയ്തു. ഗ്രാമവികസന വകുപ്പിലാണ് ഏറെ കൗതുകകരവും മാതൃകാപരവുമായ ഈ പുരസ്‌കാര സമര്‍പ്പണം നടന്നത്. മുഖത്തല ബ്ലോക്ക് ഓഫിസില്‍ നടന്ന ചടങ്ങില്‍ മന്ത്രി ജെ മേഴ്‌സിക്കുട്ടിയമ്മ അവാര്‍ഡുകള്‍ വിതരണം ചെയ്തു. വകുപ്പിലെ പി.റ്റി.എസ്, ഡ്രൈവര്‍, ഓഫിസ് അറ്റന്‍ഡന്റ്, ടൈപ്പിസ്റ്റ് ഉള്‍പ്പടെ ഇരുപതോളം പേരാണ് സേവനിരതയിലെ അംഗീകാരപത്രം നേടിയെടുത്തത്.
ഉന്നത ഉദ്യോഗസ്ഥരെയാണ് അവാര്‍ഡിനായി സാധാരണ പരിഗണിക്കാറുള്ളതെന്നും സര്‍ക്കാര്‍ ജീവനത്തില്‍ ഏറെ കഷ്ടപ്പെടുന്ന ലോവര്‍ ക്ലാസ് ജീവനക്കാരെ തഴയാറുണ്ടെന്നുമുള്ള പരാതിയാണ് ഇതിലൂടെ പരിഹരിക്കപ്പെട്ടത്. എല്ലാ ജോലിക്കും അന്തസും പ്രാധാന്യമുണ്ടെന്നും ഏവരുടെയും സേവനം സംയോജിക്കുമ്പോള്‍ മാത്രമാണ് വികസനം സാധ്യമാകുന്നതെന്നും മന്ത്രി ജെ മേഴ്‌സിക്കുട്ടിയമ്മ പറഞ്ഞു. മുഖത്തല ബ്ലോക്ക് പഞ്ചായത്ത് പ്രസിഡന്റ് രാജീവ് അധ്യക്ഷത വഹിച്ചു. ചിറ്റുമല ബ്ലോക്ക് പഞ്ചായത്ത് പ്രസിഡന്റ് സന്തോഷ്, ഗ്രാമ പഞ്ചായത്ത് പ്രസിഡന്റുമാര്‍ തുടങ്ങിയവര്‍ പങ്കെടുത്തു.