കഠിനംകുളം: വഴി ചോദിച്ച വനിതാ എസ്.ഐ.യെയും വനിതാ പൊലിസുകാരെയും അസഭ്യം പറയുകയും കൈയ്യേറ്റം ചെയ്യാന്‍ ശ്രമിക്കുകയും ചെയ്ത കേസിലെ പ്രതികളില്‍ ഒരാളെ തുമ്പ പൊലിസ് പിടികൂടി.
കുളത്തൂര്‍ സ്വദേശി രാജീവ് (48) ആണ് പിടിയിലായത്. ചൊവാഴ്ച രാത്രി പതിനൊന്നരക്ക് കുളത്തൂര്‍ ജംങ്ഷന് സമീപമായിരുന്നു സംഭവം. കഴക്കൂട്ടം പൊലിസില്‍ പീഡിപ്പിച്ചതായി പരാതി നല്‍കിയ അന്യദേശ യുവതിയെ മെഡിക്കല്‍ കോളജ് ആശുപത്രിയില്‍ വൈദ്യപരിശോധനക്ക് ഹാജരാക്കിയ ശേഷം തിരികെ കഴക്കൂട്ടം പൊലിസ്് സ്റ്റേഷനിലേയ്ക്ക് പോകുന്ന വഴി രാത്രി കുളത്തൂര്‍ ജംങ്ഷനില്‍ നിന്ന രാജീവ് ഉള്‍പ്പെടെയുള്ളവരോട് വഴിചോദിച്ച കഴക്കൂട്ടം സ്റ്റേഷനിലെ വനിതാ എസ്.ഐയും വനിതാ പൊലിസുകാരെയും അസഭ്യം പറയുകയും, കൈയ്യേറ്റം ചെയ്യാന്‍ ശ്രമിച്ച കേസിലാണ് അറസ്റ്റ്. കേസിലെ മറ്റ് പ്രതികളെ കൂടി പിടികൂടാനുണ്ട്. സംഭവവിവരം കഴക്കൂട്ടം എസ്.ഐയെ അറിയിച്ചുവെങ്കിലും സ്ഥലത്തുണ്ടായിരുന്ന എസ്.ഐ. പ്രതികളെ പിടികൂടുവാനോ പ്രതികള്‍ക്കെതിരെ കേസെടുക്കുവാനോ, തയാറായിട്ടില്ലെന്നും ആക്ഷേപമുണ്ട്. ഉയര്‍ന്ന പൊലിസ് ഉദ്യോഗസ്ഥര്‍ ഇടപെട്ടാണ് കേസെടുത്ത് പ്രതിയെ അറസ്റ്റ് ചെയ്തതെന്നാണ് അറിവ്.