പുനലൂര്‍ (കൊല്ലം): വിളക്കുടിയില്‍ പന്ത്രണ്ടുകാരിയെ നാലു വര്‍ഷമായി ഭീഷണിപ്പെടുത്തി പീഡിപ്പിച്ചു വന്ന നാല്‍പതുകാരനായ പിതാവിനെ  പൊലിസ് അറസ്റ്റ് ചെയ്തു. കഴിഞ്ഞ ദിവസമായിരുന്നു സംഭവം പുറത്തായത്. ശാരീരിക ബുദ്ധിമുട്ടുകളെ തുടര്‍ന്ന് കുട്ടിയെ കുന്നിക്കോട്ടെ സ്വകാര്യ ആശുപത്രിയില്‍ പ്രവേശിപ്പിച്ചിരുന്നു. സംശയം തോന്നിയ ഡോക്ടര്‍ പുനലൂര്‍ താലൂക്കാശുപത്രിയിലേക്ക് മാറ്റി. അവിടെ നടത്തിയ പരിശോധനക്കിടെ പിതാവിന്റെ പീഡന വിവരം പെണ്‍കുട്ടി തന്നെ ഡോക്ടറോട് തുറന്ന് പറയുകയായിരുന്നു. തുടര്‍ന്ന് താലൂക്ക് ആശുപത്രിയിലെ ഗൈനക്കോളജി വിഭാഗം ഡോക്ടര്‍ ചൈല്‍ഡ് വെല്‍ഫെയര്‍ അധിക്യതരെ വിവരമറിയിച്ചു. കുട്ടിയുടെ മൊഴി രേഖപ്പെടുത്തിയ ചൈല്‍ഡ് വെല്‍ഫെയര്‍ കമ്മിറ്റി കുന്നിക്കോട് പൊലിസിന് നല്‍കിയ പരാതിയെ തുടര്‍ന്നാണ് പ്രതി പിടിയിലായത്. പീഡനത്തിനിരയായ കുട്ടി ഉള്‍പ്പെടെ പ്രതിക്ക് അഞ്ച് മക്കളാണുള്ളത്. മാതാവിനോട് പറഞ്ഞാല്‍ കൊന്നുകളയുമെന്ന് ഭീഷണിപ്പെടുത്തിയായിരുന്നു വര്‍ഷങ്ങളായി പീഡനം നടത്തി വന്നത്.  കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.